მისი თქმით, დროა საზოგადოებამ გაიგოს, რომ ადვოკატის და მართლმსაჯულების როლი სწორედ ისაა, რომ დანაშაულში მონაწილე პირმა, პასუხი აგოს თავის მოქმედებაზე იმ მოცულობით და ხარისხით, რაც ჩაიდინა, რაშიც ბრალი მიუძღვის, არც მეტი და არც ნაკლები.

"19 წლის ახალგაზრდა ადამიანის ტრაგიკულმა გარდაცვალებამ შემძრა და წლების წინანდელი პირადი ტკივილი განმიახლა. ტკივილი, რომელიც სულ თან დამყვება. ამ დროს, ოჯახის ნუგეში და სამძიმრის სიტყვები უძლურია, ერთია მხოლოდ - ლოცვა გარდაცვლილის სულისთვის.

ასევე შემძრა საზოგადოების აგრესიამ, რომელიც ლამის ლინჩის წესით ადამიანების გასამართლებას ითხოვს, არავინ ელოდება დანაშაულის ბოლომდე გამოძიებას, იმის გარკვევას თუ ვის რა ბრალი და რა ხარისხით მიუძღვის დანაშაულში, არა - ყველა სასტიკად უნდა დაისაჯოს!!

აბულინგებენ ყველას, მათ შორის ადვოკატებს, რომლებიც თავიანთ სამუშაოს ასრულებენ, ზოგიერთი მაღალკვალიფიციურად, ზოგიც ნაკლებად, თუმცა ადვოკატის არჩევა მათი კლიენტის გადასაწყვეტია და არა ხალხის.

თუ ნორმალური საზოგადოება და სახელმწიფო გვინდა, დროა გავიგოთ, რომ ადვოკატის უფლება აქვს ყველას, სერიული მკვლელიდან დაწყებული ნიურნბერგის ნაცისტი დამნაშავით დამთავრებული და რომ არც ერთ ნორმალურ საზოგადოებაში, ადვოკატი თავისი პროფესიის გამო არ ხდება შეჩვენების ობიექტი.

დროა გავიგოთ, რომ ადვოკატის და ზოგადად მართლმსაჯულების როლი სწორედ ისაა, რომ დანაშაულში მონაწილე პირმა, სამართლიანი პროცედურის შედეგად, პასუხი აგოს თავის მოქმედებაზე იმ მოცულობითა და ხარისხით, რაც ჩაიდინა, რაშიც ბრალი მიუძღვის, არც მეტი და არც ნაკლები.

იმას მაინც თუ ვხვდებით ნეტა, რომ ასე ხელაღებით ყველას “დახვრეტა-განადგურების” მოთხოვნით სისასტიკის და სიძულვილის წახალისებას ვახდენთ და ხელს ვუწყობთ ძალადობის ახალი ტალღის გავრცელებას.

დავფიქრდეთ, საზოგადოების ზღვარგადასული აგრესიის ბრალიც ხომ არაა ძალადობისა და კრიმინალური სუბკულტურის მაღალი დონე ჩვენს ახალგაზრდებში," - წერს დავით ასათიანი.