"რაღაც უცნაური ტენდენცია გამოიკვეთა საზოგადოების ნაწილში გიორგი შაქარაშვილის მკვლელობის საქმესთან დაკავშირებით:

გამოჩნდნენ ყველაფერზე მაღლა მდგომი "ობიექტურები", "მიუკერძოებლები", რომლებიც გვირჩევენ დაველოდოთ გამოძიებას და ვლანძღოთ მასმედია – იმ გამოძიებას, რომელიც არ იქნებოდა რომ არა მასმედიის აქტიურობა, ყალბი პათოსით და ბრტყელ–ბრტყელი სიტყვებით გვამუნათებენ, აცალეთ ოჯახს გლოვაო. ამას კიდევ ახალი "შეგონება" დაემატა – კი მაგრამ თუ ოჯახი (ბიძას გულისხმობენ სავარაუდოდ) ენდობა გამოძიებას და არ ენდობა ამ გამოძიების მაკრიტიკებლებს, თქვენ ვინ გეკითხებათ რომ ერევით საქმეში, თქვენ რა გიორგი მის ოჯახზე მეტად გიყვარდათო?

ამ ყალბი, არაადეკვატური და ამაზრზენი ტენდენციის მიმდევართა საყურადღებოდ!

ეს მკვლელობაა და არა მანქანის გაკაწვრის საქმე, როცა მანქანის პატრონს შეუძლია თავად გადაწყვიტოს, უჩივლოს თუ არა გამკაწვრელს – ეს ერთი!

გიორგი შაქარაშვილის მკვლელობა არის სისტემური დანაშაული, რადგან სრულიად აშკარაა ხელისუფლების მცდელობა ხელი დააფაროს მკვლელებს!

ამიტომ და არა მხოლოდ ამიტომ, ამ საქმის გამოძიება და ნამდვილი მკვლელების დადგენა მარტო მისი ოჯახის საქმე არ გახლავთ! ეს ჩემი საქმეცაა! თქვენი საქმეცაა და ყველასი, ვისაც საკუტარი შვილებისთვის უსაფრთხო მომავალი უნდა!

ხელისუფლების მიერ რბილად რომ ვთქვათ წახალისებული კრიმინალები, რა პროფესიისაც არ უნდა იყვნენ ისინი, საშიშია თქვენი შვილებისთვისაც და ძალიან სამწუხაროა რომ თქვენ ეს არ გესმით!

ამდენი ყალბი პათოსის შემცველი განცხადებების სანაცვლოდ, ეგებ იფიქროთ იმაზე რომ სისტემური დანაშაული ყველასთვის ერთნაირად საშიშია და ამდენად ეს ყველას საქმეა!

სისტემური დანაშაული უნდა გაიხსნას ბოლომდე!

უნდა დაინგრეს ის სისტემა რომელიც ამ დამნაშავეებს როცა დაჭირდება სათავისოდ იყენებს! და ეს მარტო ჭირისუფლის პრობლემა არაა! ამ სისტემის დანგრევით მე ჩემ შვილებს ვიცავ!

დიახ! ეს ჩემი საქმეა!

დაიცავით საკუთარი შვილები!"- წერს ის.