საქართველოს პრემიერ-მინისტრის ირაკლი ღარიბაშვილის განცხადებით, ქუთაისში, პარლამენტის შენობის ბაზაზე აიტი ჰაბი შეიქმნება.
მისივე თქმით, საკითხთან დაკავშირებით ერთ-ერთ ებრაულ კომპანიასთან თანამშრომლობენ.
„მოგეხსენებათ, ქუთაისში პარლამენტის შენობა პრაქტიკულად უფუქნციოდ არის დარჩენილი. ჩვენი მიზანია, მაქსიმალურად ხელი შევუწყოთ იქ აიტის მიმართულების განვითარებას. ვმუშაობთ ერთ-ერთ ებრაულ კომპანიასთან, რომელიც გამოთქვამს სურვილს, პარლამენტის შენობის ბაზაზე შეიქმნას ახალი აიტი ჰაბი, არა მხოლოდ ტექნოლოგიური ჰაბი, რომელიც მოიზიდავს, დაასაქმებს აიტის სფეროში მომუშავე ახალგაზრდებს, ქართველ სტუდენტებს, ახალგაზრდებს ხელს შეუწყობს განვითარებაში. აქაც რამდენიმე ათეული მილიონი დოლარის ინვესტიცია განხორციელდება. რა თქმა უნდა, ქუთაისის უნივერსიტეტი შეიძლება იყოს ძალიან მნიშვნელოვანი პარტნიორი ამ პროექტში“, – განაცხადა ირაკლი ღარიბაშვილმა.
