პუტინმა ქართველ და მოლდოველ ხალხებს გამარჯვების დღე მიულოცა
რუსეთის პრეზიდენტმა ვლადიმირ პუტინმა გამარჯვების დღე მიულოცა 8 სახელმწიფოს - აზერბაიჯანის, სომხეთის, ბელარუსის, ყაზახეთის, ყირგიზეთის, ტაჯიკეთის, თურქმენეთისა და უზბეკეთისა და ასევე ოკუპირებული აფხაზეთისა და სამხრეთ ოსეთის მეთაურებს.
კრემლის საიტზე გამოქვეყნებული მილოცვის ტექსტის მიხედვით, პუტინი გამარჯვების დღეს ულოცავს ასევე საქართველოსა და მოლდოვის ხალხებს და არა ამ ქვეყნების მეთაურებს.
ამასთან, მისალოც ტექსტში საერთოდ არაა ნახსენები უკრაინის არც ხალხი და არც ხელისუფლება.
„დღეს ჩვენი მორალური ვალია, წმინდად შევინახოთ ჩვენი მამებისა და ბაბუების მიერ ნაანდერძევი მეგობრობისა და ურთიერთდახმარების ტრადიციები, არ დავუშვათ დიდ სამამულო ომზე ისტორიული სიმართლის დამახინჯება, ისევე როგორც ნაცისტების, მათი თანამზრახველებისა და ამჟამინდელი იდეური მემკვიდრეების გამართლება“, - ნათქვამია პუტინის განცხადებაში.
9 მაისს მოსკოვში გამარჯვების დღის აღნიშვნას, სავარაუდოდ, დაესწრებიან ყირგიზეთის პრეზიდენტი სადირ ჯაფაროვი, სომხეთის პრემიერ-მინისტრი ნიკოლ ფაშინიანი და ყაზახეთის პრეზიდენტი ყასიმ ჟომარტ ტოყაევი. ფაშინიანის მოსკოვში ვიზიტის შესახებ 8 მაისს გახდა ცნობილი. სომხეთის მთავრობის პრესსამსახური იტყობინება, რომ ის „მონაწილეობას მიიღებს დიდ სამამულო ომში გამარჯვებისადმი მიძღვნილ ღონისძიებებში“.
პუტინმა მოსკოვში ზეიმზე ასევე მიიწვია თურქმენეთის პრეზიდენტი სერდარ ბერდიმუხამედოვი. სახელმწიფო სააგენტო Turkmenistan Today იტყობინება, რომ ბერდიმუხამედოვმა "მადლობა გადაუხადა მეგობარი სახელმწიფოს ლიდერს მოწვევისთვის". ამასთან, არ ვრცელდება ინფორმაცია იმის შესახებ, ჩავა თუ არა იგი მოსკოვში.
კიდევ ერთი უცხოელი ლიდერი, რომელიც მოსკოვში გამარჯვების დღის აღსანიშნავ ღონისძიებებზეა მიწვეული, ტაჯიკეთის პრეზიდენტი ემომალი რაჰმონია. დათანხმდა თუ არა ის მიწვევას, უცნობია. მისმა პრესსამსახურმა თქვა, რომ რაჰმონი დუშანბეში დაგეგმილ ღონისძიებებში მონაწილეობას აპირებდა.
სიახლეები
- აშშ რუსეთს ადანაშაულებს უკრაინელი სამხედროების წინააღმდეგ ქიმიური იარაღის გამოყენებაში
- "ბიძინა ივანიშვილის მიერ ორი დღის წინ გაკეთებული განცხადებები ჩვენი პარტნიორებისთვის ომის გამოცხადებაა - ის, რაც მიუღებელია მოსახლეობისთვის, მიუღებელია პრეზიდენტისთვის'' - სალომე ზურაბიშვილი
- დღეს ტაძრებში დიდი ხუთშაბათის მსახურება შესრულდება
- დღეს პარლამენტში დაგეგმილი ბიუროს და პლენარული სხდომები არ გაიმართება - შენობაში 14:00 საათამდე უსაფრთხოების წითელი დონე იმოქმედებს
- "საქართველო ევროკავშირის კანდიდატი ქვეყანაა და მის ხელისუფლებას მოვუწოდებ, რომ მშვიდობიანი შეკრების უფლება უზრუნველყოს " - ჯოზეფ ბორელი