"არასდროს გასულა ახალგაზრდების წინააღმდეგ ბრძოლა საქართველოში და არასდროს გავა თავისუფლების ჩახშობა"

სამოქალაქო მოძრაობა „ლელოს“ დამფუძნებლის, მამუკა ხაზარაძის განმარტებით, მოძრაობის ახალი წევრების გორის პოლიციასთან წარდგენის გადაწყვეტილება „ლელოს“ ახალი წევრის, 18 ნოემბრის აქციის დაშლისას დაკავებული გიორგი ბუნტურის მხარდასაჭერად გადაწყდა.


ახალი წევრების თორმეტკაციანი სიის სათავეში მყოფ გიორგი ბუნტურს ადმინისტრაციული წესით ხუთდღიანი პატიმრობა აქვს შეფარდებული და შსს-ს გორის სამმართველოს წინასწარი დაკავების იზოლატორშია მოთავსებული.


„აქ იმიტომ ვიმყოფებით, რომ ჩვენი თანაგუნდელი, „ლელოს“ წევრი გიორგი ბუნტური იმყოფება ამ იზოლატორში. ახალგაზრდა კაცი, რომელმაც გააპროტესტა ის უსამართლო გადაწყვეტილება, რომელიც თავზე გადაგვახიეს მთელ მოსახლეობას, მთელ საქართველოს, ის უნამუსო დაპირება და ის ტყუილი, რომელიც ასე თვალებში მოგვაყარეს, სწორედ ამის საპროტესტოდ გამოვიდა თავის მეგობრებთან ერთად და საბჭოთა სასამართლომ 1984 წლის დადგენილებებით და წესებით გაასამართლა ჩვენი ახალგაზრდები 21-ე საუკუნეში. ეს არის საბჭოთა სასამართლო, საბჭოთა მენტალიტეტი, საბჭოთა აზროვნების ბიძინა ივანიშვილი თავისი საბჭოური მენტალობის მოძრაობით, რომელსაც ე.წ. ოცნება დაარქვა. ეს არ გავა, არასდროს არ გასულა ახალგაზრდების წინააღმდეგ ბრძოლა საქართველოში, და არასდროს არ გავა თავისუფლების ჩახშობა საქართველოში. ჩვენ აქ ჩამოვედით მხარდასაჭერად და იმ 12 წევრის დასასახელებლად, რომელთა პირველი წევრი არის გიორგი ბუნტური. ჩვენ მას სოლიდარობას ვუცხადებთ, სოლიდარობას ვუცხადებთ ყველა იმ ახალგაზრდას, რომელიც უსამართლოდ, ძალიან სამარცხვინოდ დააპატიმრეს.


ჩვენ გავაგრძელებთ საზოგადოების მობილიზებას, გავაგრძელებთ პროტესტს, ჩვენ გვაქვს ჩვენი ფორმები პროტესტის და ვიბრძოლებთ მანამ, სანამ საქართველოში არ დამყარდება სრული დემოკრატია, სანამ საქართველო არ დაადგება სრულად ევროგანვითარების გზას, სანამ ჩვენ არ შევცვლით ამ უნამუსო ხელისუფლებას და არ გავუშვებთ სახლში იმ მოსამართლეებს და პროკურორებს, რომლებიც ემსახურებოდნენ წინა ხელისუფლებას, ახლა ემსახურებიან ამ ხელისუფლებას და ასე ხელიდან ხელში, მურუსიძის თამადობით და მსგავსი მოსამართლეებით გადადიან ხელისუფლების მსახურებაში და არა სამართლის და სამართლიანობის მსახურებაში, ჩვენ ამას დავამთავრებთ“, - განაცხადა მამუკა ხაზარაძემ.

წაკითხვა 444 ჯერ
ჩვენს შესახებ

მოკლე ინფო

ჩვენი მთავარი პრინციპებია: სიზუსტე, ოპერატიულბა და დაბალანსებული ინფორმაციის მიწოდება.

ჩვენს შესახებ

საინფორმაციო სააგენტო „პირველი ნიუსი“ 2018 წელს შეიქმნა. ჩვენი სააგენტოს ვებგვერდზე ქვეყნდება მიმდინარე პოლიტიკური, ეკონომიკური, სოციალური, მსოფლიო, კულტურული, სპორტული და სხვა აქტუალური სიახლეები.  სიტყვისა და გამოხატვის თავისუფლება ადამიანის ერთ–ერთი ძირითადი უფლებაა. სწორედ ამ უფლების გამოყენებით ჩვენმა გუნდმა აიღო ვალდებულება, რომ საზოგადოებას დროულად მივაწოდოთ ამომწურავი, ობიექტური ინფორმაცია ფაქტებისა და მოვლენების დამახინჯების გარეშე.