ის ასევე გამოეხმაურა ეუთო-ს საპარლამენტო ასამბლეის შეფასებას საქართველოში ჩატარებულ საპარლამენტო არჩევნებთან დაკავშირებით.

თალაკვაძის განცხადებით, საერთაშორისო პარტნიორების მხრიდან აღინიშნა, რომ საქართველომ პანდემიის მიუხედავად, შეძლო დემოკრატიული არჩევნების ჩატარება.

„ხაზგასმით უნდა ავღნიშნოთ ეუთო-ს საპარლამენტო ასამბლეის გუშინდელი განცხადება, სადაც მათ კიდევ ერთხელ განაცხადეს, რომ საქართველოში საპარლამენტო არჩევნები ჩატარდა კონკურენტულ გარემოში ფუნდამენტური უფლებების სრული დაცვით. ასევე, ეუთო-ს საპარალემენტო ასამბლეა მიესალმა ცესკო-ს მხრიდან ინკლუზიურ პროცესს, როცა მიმდინარეობდა საარჩევნო უბნების გადათვლის პროცესი. ეს არჩევნები ჩატარდა გლობალური პანდემიის პირობებში, რაც განსაკუთრებით აღინიშნა საერთაშორისო პარტნიორების მხრიდან. ეს არ იყო ადვილი, თუმცა საქართველომ შეძლო დემოკრატიული არჩევნების ჩატარება პანდემიის პირობებში. ესეც ხაზგასმით არის აღნიშნული საერთაშორისო სადამკვირვებლო მისიების მიერ. ჩვენ ვემზადებით მეორე ტურისთვის, ასევე ახალი პარლამენტის მუშაობისთვის, რომელიც იქნება უფრო პლურალისტური და უფრო უკეთ უპასუხებს იმ გამოწვევებს, რაც ქვეყნის წინაშე არსებობს“, – განაცხადა არჩილ თალაკვაძემ.

შეგახსენებთ, ეუთო-ს სადამკვირვებლო მისიის შეფასებით, 31 ოქტომბრის საპარლამენტო არჩევნები იყო კონკურენტუნარიანი და საერთო ჯამში, ფუნდამენტური თავისუფლებები დაცული იყო.