შაქარაშვილის საქმეზე დაკავებულის მიმართ შესაძლო ძალადობაზე გამოძიება დაიწყო
სახელმწიფო ინსპექტორის აპარატმა 19 წლის გიორგი შაქარაშვილის გარდაცვალების საქმეზე დაკავებულ პირზე შესაძლო ძალადობის გამო გამოძიება დაიწყო.
ამის შესახებ ინფორმაციას უწყების პრესსამსახური ავრცელებს.
უწყებაში აღნიშნავენ, რომ საქმეზე გამოძიება ორი მუხლით, სამსახურებრივი უფლებამოსილების გადამეტებისა (სისხლის სამართლის კოდექსის 333-ე მუხლის მე-3 ნაწილის "ბ" ქვეპუნქტი) და ჩვენების დროს ძალადობის (335-ე მუხლი) მუხლებით დაიწყო. ამ მუხლებით ჩადენილი დანაშაული 5-დან 8 წლამდე პატიმრობით ისჯება.
შინაგან საქმეთა მინისტრის მოადგილემ, ვლადიმერ ბორცვაძემ განაცხადა, რომ თუ დადასტურდება რაიმე სახის გადაცდომა ან იძულების ფაქტი სამართალდამცავი ორგანოს მხრიდან, სამართლებრივად იმოქმედებენ.
"მე როგორც ვიცი, ეს განცხადება შეიცავს შემდეგ შინაარსს, რომ ფიზიკური ძალადობა და ანგარიშსწორება განხორციელდა საგამოძიებო მოქმედების დროს. ეჭვს აჩენს აღნიშნული განცხადება იმ კუთხით, რომ თუ საგამოძიებო მოქმედების მიმდინარეობისას და მას შემდეგ განხორციელდა რაიმე სახის იძულება ან ძალადობა, რატომ გაკეთდა აღნიშნული განცხადება საგამოძიებო მოქმედებების დასრულების შემდგომ და ეს განცხადება გაკეთდა ამ ადამიანის დაკავების შემდეგ", - თქვა მან და იქვე განმარტა, რომ თუ ძალადობის ფაქტი არ დადასტურდა, ეს გამოვა ცრუ დასმენა.
დღეს, 26 ივნისს, 19 წლის გიორგი შაქარაშვილის გარდაცვალების საქმეზე 17 პირი დააკავეს. დაკავებულები ადვოკატებმა უკვე მოინახულეს. ერთ-ერთმა, გიორგი გელხაურმა, დიღმის პოლიციის სამმართველოდან გამოსვლის შემდეგ განაცხადა, რომ მისი დაცვის ქვეშ მყოფ არასრულწლოვანზე პოლიციამ ჩვენების მიცემის დროს იძალადა. მისივე განმარტებით, ძალადობას ესწრებოდა მშობელიც.
19 წლის გიორგი შაქარაშვილი, რომელიც მცხეთაში, მეგობრის წვეულებაზე იმყოფებოდა, 19 ივნისს გაუჩინარდა. 4 დღის შემდეგ მაშველებმა მისი ცხედარი მდინარე არაგვში აღმოაჩინეს.
სიახლეები
- "აუცილებელია, გამოვტაცოთ ხელიდან საარჩევნო კომისია და არავითარ შემთხვევაში, არანაირი სახეცვლილი ფორმით არ დავუშვათ „რუსული კანონის“ მიღება, რომელიც ფაქტობრივად არჩევნებსაც აუქმებს"
- "გარედან თავსმოხვეული ე.წ. პოლარიზაციის დაძლევა არის ჩვენი პასუხისმგებლობა ქართველი ხალხის წინაშე, რომელმაც ქვეყნის მართვის მანდატი უკვე რვაჯერ მოგვანიჭა"
- "ვაფრთხილებ რადიკალური ოპოზიციის ძალადობრივი დაჯგუფებების თითოეულ წევრს, ძალადობისთვის კანონის წინაშე ყველა უმკაცრესად აგებს პასუხს"
- "ჩვენი ქვეყანა თავისი განვითარების ერთ-ერთ რთულ მონაკვეთს გადის, მშვიდობა ყველას გვინდა, მაგრამ მისი მიღწევა ხშირად გვიჭირს, რადგან არ ვიქცევით სწორად"
- "გუშინდელი აქცია იყო უფრო ხალხმრავალი, ვიდრე „მაიდნებზე“ უკრაინაში, „ეროვნული მოძრაობის“ გარიჟრაჟზე 9 აპრილს და „ვარდების რევოლუციის“ დროსაც კი"