როგორც გარემოს დაცვისა და სოფლის მეურნეობის მინისტრის მოადგილემ განმარტა, პროექტის ფარგლებში, დაგეგმილია 3000 სამუშაო ადგილის შექმნა, აგრობიზნესის გაყიდვების 60 მილიონი დოლარით გაზრდა და 7 მილიონი დოლარის კერძო ინვესტიციის მოზიდვა. ნოდარ კერესელიძის თქმით, პროგრამა ფერმერებსა და კერძო ბიზნესის წარმომადგენლებს განვითარებისა და ეკონომიკური წინსვლის უნიკალურ შანსს აძლევს.

,,წინა პროგრამა დასრულებულია და ახალი პროგრამა მის შედეგებს დაემყარება. მთავარი მიზანი სასოფლო სამეურნეო საქმიანობის ხელშეწყობა, კონკურენტუნარიანობის ზრდა და კერძო ბიზნესის განვითარებაა. გამოვაცხადებთ საგრანტო კონკურსებს, რომელიც ხელს შეუწყობს ბიზნესის განვითარებას’’-განაცხადა ნოდარ კერესელიძემ.

აშშ-ის ელჩის მოვალეობის შემსრულებლის თქმით, კერძო ბიზნესის წარმომადგენლებთან შეხვედრა ნაყოფიერი გამოდგა.

,,მოხარული ვარ, რომ ქუთაისში ვიმყოფები და ბევრი წარმატებული კომპანიის საქმიანობის შესახებ მოვისმინე. ასევე მოვისმინე იმ ფაქტორების შესახებ, რომლებიც მათ წინსვლას მნიშვნელოვნად აფერხებენ. მომავალში ერთად მოვძებნით ამ პრობლემების გადაჭრის გზებს.  ველით წარმატებებს USAID-ის ახალი პროექტის ფარგლებში ’’-აღნიშნა როს ვოლსონმა.