ტოტო (ნამდვილი სახელი – სალვატორე) კუტუნიომ მუსიკალური კარიერა 1960-იან წლებში დაიწყო. თავიდან დრამერი იყო, შემდეგ ჯაზით და ფორტეპიანოზე დაკვრით დაინტერესდა და სიმღერებსაც წერდა. საკუთარი ჯგუფის – Albatros-ის შექმნის მცდელობა წარუმატებელი აღმოჩნდა და მომღერალმა სოლო კარიერა დაიწყო, რამაც მას მსოფლიო პოპულარობა მოუტანა.

1990 წელს ტოტო კუტუნიომ ევროვიზიაზე გაიმარჯვა ზაგრებში.

იგი თავისი ტკბილი, მელოდიური ხმითა და მომხიბვლელი გარეგნობით უამრავი ქალის ოცნების მამაკაცს წარმოადგენდა. მომღერალი საავტორო სიმღერებსაც წერდა ისეთი ცნობილი მომღერლებისთვის, როგორებიც იყვნენ: ჯო დასენი, მირეი მატიე, ადრიანო ჩელენტანო, ჯგუფი Ricchi e Poveri, დალიდა და სხვები.

კუტუნიო მთელმა მსოფლიომ გაიცნო თავისი ჰიტით „L’Italiano“ (Lasciate Mi Cantare), რომელიც მისი სავიზიტო ბარათი გახდა და იტალიის არაოფიციალურ ჰიმნად იქცა.

ტოტო კუტუნიო საქართველოშიც იმყოფებოდა ორჯერ – 2007 და 2012 წლებში და ქართველი მსმენელისთვის კონცერტები გამართა.

2007 წლის 26 მაისს ტოტო კუტუნიოს კონცერტი თბილისში ღია ცის ქვეშ გაიმართა. მომღერალმა ქართველ მსმენელს მაშინ სიურპრიზი მოუწყო და ქართულად იმღერა „სულიკო“, თუმცა სიურპრიზები იმ საღამოს ამით არ ამოწურულა. ერთ-ერთი სიმღერის წინ ტოტომ ქართველი ქალების სილამაზეზე ისაუბრა, შემდეგ განაცხადა, ეს სიმღერა ქართველ ქალებს ეძღვნებაო და თავისი ერთ-ერთი ჰიტი შეასრულა.

2012 წელს კი იტალიელმა მომღერალმა შობის დღესასწაულთან დაკავშირებით ისევ თბილისში, გლდანის პარკში გამართა უფასო კონცერტი.