ინფორმაცია ოკუპირებული აფხაზეთის ე.წ. საგარეო საქმეთა მინისტრმა სერგეი შამბამ დაადასტურა. მისი თქმით, მოსკოვმა არაერთგზის განაცხადა, რომ აფხაზეთის მიერ ნაკისრმა შეუსრულებელმა ვალდებულებებმა შეიძლება გარკვეული სანქციები გამოიწვიოს. “ისინი უკვე ამოქმედდა 1 სექტემბრიდან, მოგეხსენებათ, გარკვეული სოციალური დაფინანსება უკვე შეჩერებულია, რაც ეხებათ ექიმებს, მასწავლებლებს, ძალოვან სტრუქტურებს და სხვა. ნათელია, ეს პირველი ასეთი ნაბიჯებია, გარდა ამისა, დგას საკითხი, რომ ამიერიდან ელექტროენერგიის იმ ნაკადში, რომელსაც ყოველ ზამთარში ვიღებთ, კომერციული ფასი უნდა გადავიხადოთ”, - თქვა შამბამ ბრიფინგზე”, - წერს გაზეთი “რეზონანსი” სტატიაში, სათაურით “აფხაზები ცდილობენ საქართველოსთან ურთიერთობა დაათბონ” - რა პროცესები მიდის სოხუმში.

“მედიის ცნობით, ბჟანიასა და ნოვაკის შეხვედრის ოქმის მიხედვით, რუსეთი 1-ელი სექტემბრიდან ოკუპირებული აფხაზეთისთვის ფინანსური დახმარების შეჩერებას აპირებს, სანამ “აფხაზური მხარე” შემდეგ ვალდებულებებს არ შეასრულებს: - ეკონომიკურ საქმეებზე სასამართლო და საარბიტრაჟო გადაწყვეტილებების აღიარებისა და აღსრულების შესახებ შეთანხმების რატიფიცირება; - რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების შესრულების შესახებ შეთანხმების ძალაში შესვლის უზრუნველყოფა; - რუსი ინვესტორებისთვის შეზღუდვების მოხსნა კომერციული უძრავი ქონების ბაზარზე (აპარტამენტები). ამასთან, ოკუპანტი ქვეყანა აპირებს, სახელმწიფო სათათბიროსა და ფედერაციის საბჭოს მოუწოდოს, მინიმუმამდე დაიყვანონ “აფხაზეთის პარლამენტის დეპუტატებთან” კონტაქტი რუსეთის წინაშე ვალდებულებების შესრულებისადმი არაკონსტრუქციული პოზიციის გამო. აფხაზური მედია კი აქტიურად წერს კრემლის მოხელეებსა და ოკუპირებული აფხაზეთის დე ფაქტო ხელისუფლებას შორის მომხდარი ძლიერი განხეთქილების შესახებ”, - აღნიშნავს გამოცემა.

“რუსულენოვანი ტელეგრამარხი “აფხაზეთის კომპასი” თავის წყაროებზე დაყრდნობით, წერს მძიმე საუბარზე, რომელიც ასლან ბჟანიას ჰქონდა რუსეთის პრეზიდენტის ადმინისტრაციაში აფხაზეთში კრემლის გეგმების შეფერხების გამო. აფხაზეთში არც ის გამოჰპარვიათ, რომ პუტინმა, დამკვიდრებული ტრადიციის საწინააღმდეგოდ, არ მიულოცა სოხუმს აღიარების მორიგი წლისთავი. აფხაზეთის თვითაღიარებულ რესპუბლიკაში პოლიტიკის მთავარი თემა დე ფაქტო პრეზიდენტის, ასლან ბჟანიასა და მოსკოვის ურთიერთობაა. აფხაზური ტელეგრამარხები რუსეთ-აფხაზური “სამთავრობათაშორისო კომისიის” სხდომის ჩაშლასა და რუსული დოტაციების გაყინვის შესახებაც წერენ. არსებობს აფხაზებში ვერსია, რომ კრემლი თბილისთან კულუარულ მოლაპარაკებებს აწარმოებს და მათი დასჯის მიზნით, საქართველოსთვის აფხაზეთის დაბრუნეებას აპირებს. ამ შეთქმულების თეორიების ფონზე, კონფლიქტოლოგები ფიქრობენ, რომ შესაძლოა თბილისსა და მოსკოვს შორის გარკვეული კომუნიკაცია მართლაც ხდებოდეს და პუტინი აფხაზების უმადურობით გაბრაზებული მათ თავიდან მოშორებას ფიქრობდეს”, - განაგრძობს გამოცემა.

“კონფლიქტოლოგი ზურაბ ბენდიანიშვილი ამბობს, რომ აფხაზეთისთვის არც ისე შორს არის უკვე ე.წ. საპრეზიდენტო არჩევნები და ამიტომ დიდი ალბათობით რუსეთმა ამისთვის მზადება დაიწყო. კონფლიქტოლოგი მიიჩნევს, რომ კრემლი ახლა ცდილობს ასლან ბჟანია თავიდან საბოლოოდ მოიშოროს და თავისი მორჩილი ე.წ. ხელისუფლება შეარჩიოს. “ახლა აფხაზებსა და რუსებს შორის დაპირისპირების პროცესი კიდევ უფრო გაღრმავდება. აფხაზები დაფინანსების შეჩერების გამო, აგარაკის საკითხს არ დათმობენ და რუსეთისთვის მუხლის მოდრეკვას არ აპირებენ. ის თანხები რაზეც საუბარია, არ არის წარმოუდგენელი მასშტაბის და არ გამოვრიცხავ, რომ აფხაზებმა რაღაცა ალტერნატიულ წყაროებზე ფიქრი დაიწყონ. მათ შორის კულუარულად საქართველოს გავლითაც. ეს კი ჩვენთვის ძალიან ხელსაყრელი პროცესი იქნება და რაც უფრ მეტად დავაშორებთ აფხაზეთს რუსეთს, ეს მომავლის პერსპექტივაზე, ქართველების და აფხაზების ურთიერთობის დალაგებაზე დადებით ასახვას ჰპოვებს”, - ამბობს ბენდიანიშვილი, რომლის თქმით “სიტუაცია კიდევ უფრო გართულდება, რადგან პარალელურად კრემლი ეძებს ერთგულ ხალხს, რომლებიც მისი პირობების შესრულებას შეძლებენ და აფხაზებს დაარმწუნებენ ამ დათმობაზე წასვლის აუცილებლობაში”, - დასძენს გამოცემა.

“თუმცა ეს, ჩემი აზრით აბსოლუტურად კონტრპროდუქტიული იქნება, რადგან რუსეთმა რამდენჯერაც ე.წ არჩევნებში ჩარევა სცადა და თავისი კანდიდატურა დააყენა, იმდენჯერ წააგო. თუმცა სხვა ბერკეტებიც უკვე აღარ გააჩნიათ. აფხაზებს უკვე დიდი ხანი ამით აშინებდნენ. დაანონსებული იყო,რომ თუკი ქმედით ნაბიჯებს არ გადადგამდნენ, მაშინ ამ ნაბიჯზეც წავიდოდნენ. მიუხედავად ამისა, აფხაზების გატეხვა მაინც ვერ შეძლეს. ფაქტია, რომ დე ფაქტო ხელისუფლება, ოპოზიცია და ხალხიც აპარტამენტების თემასთან დაკავშირებით, ყველა ერთ აზრზეა. ეს კრემლს აჩვენეს და ვნახეთ უკვე იქიდან საპასუხო ნაბიჯებიც გადაიდგა. რუსეთი სწორედ ამაზე გამწარდა და ამიტომაც ასეთ კარდინალურ ნაბიჯებზე წავიდა. კრემლს ახლა სამხედრო გადატრიალების გარდა სხვა არაფერი აღარ დარჩა იმისთვის, რომ ე.წ. ხელისუფლება და ხალხის ამ ვალდებულებების შესრულებაზე დაითანხმოს”, - აცხადებს გამოცემის კორესპონდენტთან საუბრისას ზურაბ ბენდიანიშვილი.

“საინტერესოა ასევე აფხაზეთიდან წამოსული განცხადებები “ქართული ოცნების” მისამართით, რომელიც საქართველოს ტერიტორიული მთლიანობის აღდგენას აანონსებს. ერთის მხრივ ცოტა გასაკვირია, მაგრამ მეორე მხრივ, აფხაზებს დღეს კრემლთან დაპირისპირების ფონზე, დეფიციტის შევსება სჭირდება. აფხაზები ამას უკვე მშვენივრად ათვიცნობიერებენ, ამიტომაც ცდილობენ, რომ საქართველოსთან ურთიერთობები კიდევ უფრო დაათბონ, რაც ძალიან პოზიტიური მოვლენაა. მე ვფიქრობ, რომ ივანიშვილი აფხაზეთის დაბრუნების გეგმას მხოლოდ რუსეთთან კომუნიკაციით არ ხედავს. ახლა ვხედავთ ჩვენ რომ კავკასიაში ჩინეთი და თურქეთიც ახალ მოთამაშეებად არიან შემოსულები. გარკვეული ანტიდასავლური სივრცე იქმნება თავისი ჩინური ეკონომიკური შესაძლებლობებით და ამ სივრცეში უფრო მგონია, რომ ივანიშვილი აფხაზეთის და ოსეთის დაბრუნების გეგმას ხედავს. ივანიშვილი ფიქრობს, რომ ჩინეთის და თურქეთის ინტერესების ბალანსის შესაბამისად, რაღაცნაირად ტერიტორიული მთლიანობის აღდგენას შეძლებს. ვფიქრობ, რომ ის მხოლოდ რუსეთის იმედად არ არის. ზუსტად რა გეგმა აქვს მას და რა სქემას ალაგებს, რთულია ამაზე საუბარი, თუმცა ეს ფაქტია“, - ამტკიცებს ბენდიანიშვილი.