საპრემიერო ჩვენებას საქართველოს კულტურის, სპორტისა და ახალგაზრდობის მინისტრი თეა წულუკიანი, იმერეთის სახელმწიფო რწმუნებული ზვიად შალამბერიძე, ქუთაისის საკრებულოს თავმჯდომარე ირაკლი შენგელია და სხვა მოწვეული სტუმრები ესწრებოდნენ.

პოლონელი დრამატურგის, ანჯეი სარამონოვიჩის, გახმაურებული კომედია ,,ტესტოსტერონის" თეატრალური ვერსია ქართულ სცენაზე რეჟისორმა ნინო მაღლაკელიძემ დადგა. სცენოგრაფები და კოსტიუმების ავტორები არიან შოთა ალიბეგაშვილი და აჩიკო შამახია, რეჟისორის ასისტენტია მაია კვიმსაძე. სპექტაკლი ეხება ქალისა და კაცის ურთიერთობას, გადმოცემულია მათი ტრავმები, ნაჩვენებია, როგორ წარმოუდგენია ზოგიერთ მამაკაცს, ვინ არის ქალი და როგორ უნდა მოექცეს მას; როგორია კაცი, როცა ის მხოლოდ მამაკაცთა საზოგადოებაშია და როგორი წარმოუდგენიათ მათ ქალი.

სპექტაკლში მონაწილეობენ როგორც მესხიშვილის თეატრის, ასევე მიწვეული მსახიობები: აბელ სოსელია, ბაქარ დეისაძე, იოანე იმედაძე, გია საგინაშვილი, ლექსო ჩემია, ნიკა ძნელაძე, სულხან გოგოლაშვილი და სოფო ჩირაძე.

სპექტაკლის ნახვა ასევე შესაძლებელი იქნება 31 იანვარს.