აქციის მონაწილეები მხარდაჭერასა და სოლიდარობას უცხადებენ უკრაინელ ხალხს.

,,ჩვენი ორგანიზაციის სახელწოდებიდანაც ჩანს ვინ ვართ და რატომ ვდგავართ აქ. ფონდი ,,სოხუმი’’ აფხაზეთიდან დევნილმა ქალებმა დააარსეს. ჩვენ ვიცით რას ნიშნავს ომი, ყველამ გამოვიარეთ ეს საშინელება და გულგრილი ვერ დავრჩებოდით იმ მოვლენების მიმართ, რაც უკრაინაში ხდება. ჩვენი სურვილია მშვიდობა. გვსურს მალე დასრულდეს ეს საშინელი დღეები უკრაინაში,’’- განაცხადა ფონდ ,,სოხუმის’’ საინფორმაციო სექტორის ხელმძღვანელმა ლალი შენგელიამ FirstNews.ge-თან საუბარში.

,,ფონდ ,,სოხუმის’’ სახელით მზად ვართ არა მხოლოდ სიტყვით, არა მხოლოდ მორალური მხარდაჭერით, ჰუმანიტარული ტვირთით და ფინანსური დახმარებით, გვერდით დავუდგეთ უკრაინელ დედებს და ბავშვებს. ჩვენ მზად ვართ გავაკეთოთ ყველაფერი, რომ ვიზრუნოთ გმირი ერის დედებისთვის და გმირი ხალხის ღირსეული მომავლისთვის. მშვიდობა უკრაინას და მშვიდობა საქართველოს,’’- აღნიშნა ფონდ ,,სოხუმის’’ თბილისის ოფისის ხელმძღვანელმა, ეკატერინე გამახარიამ.

8 მარტს ქალთა სოლიდარობის აქცია, ფონდ „სოხუმის“ ტრადიციაა, რომელიც ქალთა უფლებების დაცვის კვირეულში იმართება.

ქალთა ფონდი „სოხუმის“თანამშრომელთა უმრავლესობა აფხაზეთიდანაა და 1992-93 წლების შეიარაღებული კონფლიქტის შემდეგ, როცა ქართულ მოსახლეობას იძულებით დაატოვებინეს საკუთარი სახლები, საქართველოს სხვადასხვა კუთხეში ცხოვრობს დევნილის (იძულებით გადაადგილებული პირის) სტატუსით.

დევნილობასთან დაკავშირებული უამრავი პრობლემის მოგვარება მხოლოდ გაერთიანებით და ერთმანეთის მხარდაჭერით არის შესაძლებელი. სწორედ ეს იყო ქალთა ფონდ „სოხუმის“ შექმნის მიზანი, რომელიც უკვე 25 წელია, აქტიურად მუშაობს გენდერული თანასწორობის, ქალთა მიმართ ძალადობის აღმოფხვრის და არაძალადობრივი კულტურის დამკვიდრების, ქალთა პოლიტიკური გაძლიერების და მშვიდობის მშენებლობაში მათი ქმედითი ჩართვის მიმართულებით.