შეკრებილები, როგორც თბილისა და ბათუმში, რუსული საკრუიზო გემის შემოსვლას აპროტესტებენ. აქციის მონაწილეები რუსული ლაინერის ზღვისპირა რეგიონში შემოსვლას გმობდნენ და დაკავებულებს სოლიდარობას უცხადებდნენ.

აქციის შესახებ FirstNews.ge-ს უფრო ვრცლად ქუთაისის დემოკრატიის სკოლის კოორდინატორი მათე ჩაფიჩაძე ესაუბრა:

"დღევანდელი შეკრება მიზნად ისახავს ბათუმსა და თბილისში გამართული აქციის სოლიდარობას. რეალურად, ამ კრუიზის შემოსვლითა და მისი მგზავრების მიერ გაჟღერებული მესიჯებით ჩვენი ეროვნული ღირსებაა შეურაცხყოფილი. ეს ხალხი ამბობს, რომ ჩამოვიდნენ საბჭოთა კავშირში, მათი გადმოსახედიდან აქ არაფერი შეცვლილა, ჩვენი წინაპრების ბრძოლა და ომი, ფაქტობრივად წყალში იყრება. აქ შეკრებილი მოქალაქეები გამოვხატავთ სწორედ ამ ყველაფრის მიმართ პროტესტს. კარგად ვიცით, რომ ჰაერიდანაც შემოდიან და სახმელეთო საზღვრიდანაც, მაგრამ ამ შემთხვევაში კრუიზს გასართობი დანიშნულება აქვს და შემოდიან ისეთი რუსები, რომლებსაც მიაჩნიათ, რომ საქართველო ისევ საბჭოთა კავშირშია. ეს კი იწვევს ქართველი ხალხის პროტესტს და შესაბამისად, ჩვენც დღეს, აქ ვდგავართ," - განაცხადა ჩვენთან საუბარში მათე ჩაფიჩაძემ.

შეგახსენებთ, რომ სოჭიდან წამოსულმა საკრუიზო გემმა ბათუმის პორტი ამჯერადაც აქციის ფონზე დატოვა.

ბათუმში პროტესტი მას შემდეგ მიმდინარეობს, რაც საკრუიზო ლაინერი ბათუმის პორტში ჩამოდგა. მომიტინგეები შეძახილებით რუსი ტურისტების ჩამოსვლას აპროტესტებდნენ და ითხოვდნენ, რომ საკრუიზო გემის დანიშნულების ადგილიდან ბათუმის პორტი ამოშლილიყო.

ადგილზე მთელი დროის განმავლობაში, სამართალდამცავები იყვნენ მობილიზებულები. პორტის ტერიტორია რკინის ბარიკადებით იყო შემოსაზღვრული. აქციის დროს 23 ადამიანი დააკავეს.