" ეს ივანიშვილის მიერ შექმნილი მართვადი ქაოსია, რომლითაც ქვეყანას რუსეთისკენ მიათრევს"

ნიკა გვარამია სოციალურ ქსელში შემდეგი შინაარსის სტატუსს აქვეყნებს:

"მოგესალმებით ყველას!

დიდი მადლობა მხარდაჭერისა და თანაგრძნობისთვის!
 
თავს ვგრძნობ კარგად და მხნედ! დიდი გულისყურით და კმაყოფილებით ვაკვირდები იმას, რომ ბოლო-ბოლო ყველას ჩამოეხსნა თვალებიდან ლიბრი და სრულიად გაქარწყლდა აქამდე არსებული ყველა მცირედი ილუზიაც კი, რომ ქართველებს არ შეგვიძლია ერთი მიზნის ირგვლივ გაერთიანება, რომ ყველაფერი საზოგადოებაში არსებული პოლარიზაციის ბრალია, რაშიც, თითქოს ყველანი თანაბრად ვართ ჩართული და ყველანი დამნაშავე ვართ.
არა და არა, მეგობრებო!
 
დღეს მოვისმინე გერმანელი პროფესორის ჰანს გუთბროდის უნაკლო ანალიზი და მოწოდება, რომ საქართველოსთან მიმართებით უნდა "დავმარხოთ სიტყვა პოლარიზაცია".
 
ეს მოწოდება, პირველ რიგში, ჩვენს უცხოელ მეგობრებს მიემართება, რომელნიც ამდენი ხანი შეცდომაში შეყავდა ივანიშვილის მიერ მოგონილი პოლარიზაციის აბსურდს. სინამდვილეში, ეს ივანიშვილის მიერ შექმნილი მართვადი ქაოსია, რომლითაც ქვეყანას რუსეთისკენ მიათრევს, აგერ, უკვე, რამდენი წელია და სამყაროს უქმნის არასწორ განცდას, თითქოს ჩვენ უმწეო და უუნარო ერი ვართ, რომელიც არ იმსახურებს ევროპულ ოჯახში ყოფნას.
ჭეშმარიტად, რასაც ჩვენს ქვეყანაში ვხედავთ, ეს არ არის ჰორიზონტალური პოლარიზაცია, ანუ დაპირისპირება ოპოზიციასა და ხელისუფლებას შორის, მემარჯვენეებსა და მემარცხენეებს შორის და ა.შ. ეს არის ვერტიკალური პოლარიზაცია, სადაც მაღლა პოლუსზე დამნაშავე ოლიგარქია, თავისი ღრმად კორუმპირებული სისტემით და ჩინოვნიკებით; თავისი ასი ათასობით ბიუჯეტის პარაზიტით, ვინც ხელფასზე ჰყიდის სამშობლოს; თავისი ექსტრემისტული ძალებით, ვინც არბევს, ცემს, ხოცავს, მის მიერ მიტაცებული სახელმწიფოთი. ხოლო ქვედა პოლუსზეა ქართველი პატრიოტები, ანუ ყველა დანარჩენი; რომლის ერთ პოლუსზეა ე.წ. "რუსკი მირი", ხოლო მეორეზე - ქართველი მედასავლეთეები. ესაა დაპირისპირება მოძალადესა და მსხვერპლს შორის.
 
ისმის კითხვა: როგორ უნდა მოხდეს შეთანხმება შენსა და შენი განადგურების მსურველს შორის? ან რაზე? როგორ უნდა მოხდეს ევროპული იდეის ირგვლივ გაერთიანება იმ დაჯგუფებასთან, ვისაც ამ იდეის არათუ არ სჯერა, არათუ ამ იდეის წინააღმდეგია, არამედ ღიად და აგრესიულად ეწევა ამ იდეის საბოტირებას, როგორც იანუკოვიჩი 2014 წელს?
 
ქართული ოცნება არის არსებითად რუსული ძალა და ივანიშვილის modus operandi არის აბსოლუტურად რუსული. მას არ ესმის მოლაპარაკება და შეთანხმების დაცვა; მასზე არ ჭრის დაყვავება და კომპრომისი. ის, ამ ყველაფერს, სისუსტედ აღიქვამს, როგორც სხვა ნებისმიერი რუსი.
 
თავად შიშის მთესველი, საკუთარ გადაწყვეტილებებსაც ერთადერთი ინსტიქტის კარნახით იღებს - ესაა შიში და ამიტომ, მას, როგორც ნებისმიერ სხვა რუსს, ძალის პოზიციიდან უნდა ელაპარაკო.
 
ასე რომ, გამბედაობა და უშიშრობა გვმართებს!
 
ჩვენი ისტორიული კომპასი მხოლოდ დასავლეთს აჩვენებს და არავითარი გადახვევა არ დაიშვება! ნებისმიერი წინაღობა ამ გზაზე, "რუსკი კარაბლის" გზას უნდა გავუყენოთ!
 
მივმართავ თხოვნით საერთაშორისო თანამეგობრობას: საქართველოს დღევანდელი ხელისუფლება, რუსეთიდან მართული არაქართული ძალაა! ქართული ძალა კი ვართ ჩვენ, უძველესი ევროპელები- საქართველოს ხალხი! ჩვენ არ ვიმსახურებთ ამ ხელისუფლებას და ამ შეცდომას აუცილებლად და უსწრაფესად გამოვასწორებთ! მაგრამ ჩვენ ვიმსახურებთ დაბრუნებას ჩვენს ისტორიულ წიაღში, დასავლურ ოჯახში და ეს შესაძლებლობის ფანჯარა არ უნდა დაგვეხუროს! ეს არის ყველა ქართველი პატრიოტის ნატვრა დღესაც და საუკუნეების განმავლობაშიც, და ეს არის საქართველოს ნათელი მომავლის ერთადერთი და უალტერნატივო გზა!"- წერს ნიკა გვარამია.
 
შეგახსენებთ, რომ „მთავარი არხის“ დამფუძნებელი ნიკა გვარამია და მასთან ერთად ბრალდებული კახაბერ დამენია სასამართლომ დამნაშავედ ცნო, ზურაბ იაშვილი კი უდანაშაულოდ იქნა ცნობილი. ნიკა გვარამია სასამართლომ ნაწილობრივ დამნაშავედ ცნო, მის მიმართ წარდგენილი მუხლების ნაწილი 220-ე მუხლით გადაუკვალიფიცირა და მას სასჯელის სახით 3 წელი და 6 თვე განესაზღვრა.
 
წაკითხვა 129 ჯერ
ჩვენს შესახებ

მოკლე ინფო

ჩვენი მთავარი პრინციპებია: სიზუსტე, ოპერატიულბა და დაბალანსებული ინფორმაციის მიწოდება.

ჩვენს შესახებ

საინფორმაციო სააგენტო „პირველი ნიუსი“ 2018 წელს შეიქმნა. ჩვენი სააგენტოს ვებგვერდზე ქვეყნდება მიმდინარე პოლიტიკური, ეკონომიკური, სოციალური, მსოფლიო, კულტურული, სპორტული და სხვა აქტუალური სიახლეები.  სიტყვისა და გამოხატვის თავისუფლება ადამიანის ერთ–ერთი ძირითადი უფლებაა. სწორედ ამ უფლების გამოყენებით ჩვენმა გუნდმა აიღო ვალდებულება, რომ საზოგადოებას დროულად მივაწოდოთ ამომწურავი, ობიექტური ინფორმაცია ფაქტებისა და მოვლენების დამახინჯების გარეშე.