მოხალისეობის ფორუმი პროექტის "ახალგაზრდები საზოგადოებისთვის - YOUth4 Community“-ის ფარგლებში გაიმართა, რომელიც მიმდინარეობდა USAID-ის სამოქალაქო განათლების პროგრამის ფარგლებში გაცემული გრანტით და მიზნად ისახავდა იმერეთის რეგიონის 5 მუნიციპალიტეტში მცხოვრებ ახალგაზრდებში მოხალისეობრივი კულტურის პოპულარიზაციას და ადგილობრივ დონეზე მოხალისეთა კლუბების საშუალებით სამოქალაქო ჩართულობის გაზრდას. აქვე უნდა აღინიშნოს, რომ მოხალისეობის ფორუმს ესწრებოდა იმერეთის რეგიონში USAID-ის სამოქალაქო განათლების პროგრამის პარტნიორი ორგანიზაცია სამეცნიერო-ინტელექტუალური კლუბის „თაობათა დიალოგის“ (RICDOG) გენერალური მდივანი, ირაკლი თევზაძე.

მოხალისეობის ფორუმზე ახალგაზრდებმა ერთმანეთს პროექტის ფარგლებში მიღებული გამოცდილება, მათ მიერ დაგეგმილი და საკუთარ თემში განხორციელებული ინიციატივები გაუზიარეს.

აღსანიშნავია, რომ პროექტის განმავლობაში ხუთივე ქალაქში ჩამოყალიბდა მოხალისეთა კლუბები, სადაც სკოლის მე-8, მე-9 და მე-10 კლასის მოსწავლეები გაწევრიანდნენ. პროექტის ფარგლებში ახალგაზრდებმა ერთობლივად შეიმუშავეს და განახორციელეს მოხალისეობრივი ინიციატივები.

FirstNews.ge-ი პროექტის შესახებ ახალგაზრდების მენტორს, აკაკი წერეთლის სახელმწიფო უნივერსიტეტის, ბიზნესის, სამართლის და სოციალურ მეცნიერებათა ფაკულტეტის მე-3 კურსის სტუდენტს, ანანო ხუჯაძეს ესაუბრა:

"პროექტმა მომცა შესაძლებლობა, რომ ჩემი ცოდნა არაფორმალური განათლების კუთხით გამეღრმავებინა, გავმხდარიყავი ჩემი თავის უკეთესი ვერსია.

ახალგაზრდებთან მუშაობა და მათი იდეების გაზიარება ჩემთვის კარგი გამოცდილება იყო. ყოველი აქტივობა გამოწვევა იყო უკეთესი შედეგის დასადებად და ჩემი შესაძლებლობების გამოსავლენად. ასევე, პროექტის განმავლობაში შევიძინე მეგობრები, რომლებიც ჩემს ცხოვრებას აფერადებენ,"- განაცხადა ანანო ხუჯაძემ.

პროექტის განმავლობაში ჩატარებული აქტივობები გაიხსენა და საკუთარი გამოცდილება გაგვიზიარა სსიპ ქ. ვანის N2 საჯარო სკოლის მე-8 კლასის მოსწავლემ, ხატია მაღლაკელიძემ.

„პროექტზე მხოლოდ კარგის თქმა შემიძლია. პირველივე დღეს გავიცანი უამრავი კეთილი, თბილი ადამიანი. ბანაკში გატარებული დღეებისგან მივიღე ცოდნა მოხალისეობასთან, გუნდურ მუშაობასთან, აქტივობების დაგეგმვასთან, განხორციელებასთან და მრავალ სხვა მნიშვნელოვან თემასთან დაკავშირებით. პროექტმა მომცა უდიდესი გამოცდილება, დამანახა თუ რამხელა ძალა აქვს ერთობას და მოხალისეობრივი ინიციატივების ერთად დაგეგმვას. ბანაკში გატარებული ნაყოფიერი დღეების შემდეგ ქალაქ ვანის N2 საჯარო სკოლაში ჩამოვაყალიბეთ მოხალისეობრივი კლუბი "შენი ოთახი,“ რომელმაც ბოლო რამდენიმე თვეში წარმატებით განახორციელა ორი აქტივობა და რომელიც კიდევ დიდხანს ასევე წარმატებით იფუნქციონირებს. მადლობას ვუხდი ამ პროექტის ორგანიზატორებს, მენტორებსა და დონორ ორგანიზაციას, რომ ყველამ ერთად საუკეთესო დღეები გვაჩუქეთ. ბედნიერი და ამაყი ვარ, რადგან ამ პროექტის მონაწილე მქვია,“ - აღნიშნა ჩვენთან საუბარში ხატია მაღლაკელიძემ.

პროექტის ფარგლებში აქტიური მოქალაქეობაზე, მოხალისეობაზე, თანასწორ-განმანათლებლობაზე, აქტივობების ორგანიზებასა და მართვაზე სკოლის მოსწავლეებისთვის ტრენინგ-ბანაკი ჩატარდა, რომელსაც გამოცდილი და კვალიფიციური ტრენერები, შალვა ჯინჭარაძე და მინდია თავხელიძე უძღვებოდნენ.

„პროექტის მთავარი მიზანი მოხალისეობის პოპულარიზაციაა. ზოგადად, მოხალისეობის განვითარება არის საფუძველი პასუხისმგებლობიანი და აქტიური სამოქალაქო საზოგადოების განვითარებისთვის და სამოქალაქო ინიციატივების მხარდაჭერის ცენტრის მისია სწორედ ამ ტიპის საზოგადოების ჩამოყალიბებაა. პროექტის განმავლობაში სხვადასხვა მუნიციპალიტეტიდან 70-ზე მეტი ახალგაზრდა იყო ჩართული, რომლებმაც თავიანთი იდეებით და ინიციატივებით თემში შექმნეს მოხალისეობის მაგალითი და თავიანთი აქტივობებით სხვებსაც მოუწოდეს გახდნენ მოხალისეები. საერთო ჯამში 12 ინიციატივა განხორციელდა, მათ შორის დასუფთავების და საქველმოქმედო აქციები სოციალურად დაუცველ პირებთან, შემეცნებითი, ინტელექტუალური აქტივობები. მოხალისეობა ახალგაზრდებს აძლევს საშუალებას მოახდინონ საკუთარი თავის რეალიზება სხვადასხვა სფეროში და გამოიმუშაონ ისეთი კომპეტენციები, რომლებიც დაეხმარება მათ საზოგადოებაში საკუთარი ადგილის პოვნასა და დამკვიდრებაში,“ - აღნიშნა შაკო ჯინჭარაძემ.

პროექტმა "ახალგაზრდები საზოგადოებისთვის - YOUth4 Community,“ რომელიც ხუთი თვის განმავლობაში მიმდინარეობდა USAID-ის სამოქალაქო განათლების პროგრამის ფარგლებში გაცემული გრანტით, იმერეთის რეგიონის 5 მუნიციპალიტეტი - ქუთაისი, ვანი, თერჯოლა, სამტრედია და წყალტუბო მოიცვა და მოხალისეობის თემაზე 70-ზე მეტი ახალგაზრდა გააერთიანა.