”ბევრი მტკიცებულება არსებობს იმისა, რომ ეს საპარლამენტო არჩევნები, შესაძლოა, ყველაზე გაყალბებულად ჩაითვალოს - ოპოზიციის კანდიდატების აკრძალვით დაწყებული და ბიულეტენების ჩაგდებითა და ხმების საერთო რაოდენობის მანიპულირებით დამთავრებული”, - აცხადებს კომისიის ხელმძღვანელი სენატორი ბენ კარდინი.

მან ხაზი გაუსვა, რომ კრემლმა კიდევ ერთხელ უგულებელყო ის ნორმები და ღირებულებები, რომელთა დაცვის პირობა დადო

"საერთაშორისო ვალდებულებების საწინააღმდეგოდ, რუსეთის ხელისუფლებამ დაუსაბუთებლად შეზღუდა საერთაშორისო დამკვირვებელთა რაოდენობა იმდენად, რომ ეუთო-ს ამ არჩევნების გაკონტროლება თავისი სანდო მეთოდებით არ შეეძლო“, - აღნიშნულია განცხადებაში.

სახელმწიფო სათათბიროს არჩევნებთან დაკავშირებით კომისიის თანათავმჯდომარემ, კონგრესმენმა სტივ კოენმა განაცხადა, რომ კრემლის ელიტა რუსებს ოპოზიციური კანდიდატების თავისუფლად არჩევის შესაძლებლობას ართმევს, რითაც ძალაუფლების დაკარგვის შიშს ავლენს.

”ყოველ არჩევნებზე რუსეთში სულ უფრო ნაკლებია განსხვავებული აზრის გამოთქმის შესაძლებლობა, რაც ადასტურებს, რომ პუტინი სულ უფრო არაა დარწმუნებული, რომ გარე დახმარების გარეშე ხელისუფლებაში დარჩენას შეძლებს", - აღნიშნავს კოენი.