„ბიბისის“ ინფორმაციით, რუსულმა სახელმწიფო კომპანია „გაზპრომმა“ სრულად შეუჩერა ბუნებრივი აირის მიწოდება ჰოლანდიურ კომპანია „გასტერას“, მას შემდეგ, რაც ნიდერლანდებმა ბუნებრივი აირის საფასურის რუსულ რუბლებში გადახდაზე უარი განაცხადეს.

„პირველი აპრილიდან მიწოდებულ გაზზე გადახდა უნდა განხორციელდეს რუბლებში ახალი რეკვიზიტების გამოყენებით, რის შესახებაც კონტრაგენტებს ეცნობათ დროულად“, – ნათქვამია გაზპრომის განცხადებაში.

როგორც „ბიბიბსი“ წერს, 2020 წელს ჰოლანდიაში გაზის მოხმარებამ 36,6 მილიარდი კუბური მეტრი შეადგინა, საიდანაც 11,2 მლრდ კუბური მეტრის იმპორტი რუსეთიდან განხორციელდა მილსადენის საშუალებით.

მარაგების დეფიციტის კომპენსაციის მიზნით, ბუნებრივი აირის ტრანსპორტირების ჰოლანდიური კომპანია „Gasunie“, გრონინგენის პროვინციაში, ემსჰავენის პორტში სასწრაფოდ აშენებს ტერმინალს თხევადი გაზის გადამუშავებისთვის. ტერმინალები წელიწადში 8 მილიარდ კუბურ მეტრამდე ბუნებრივი აირის მიღებისთვის არის გათვლილი.