ინფორმაციას, რომ რესპუბლიკელებმა წარმომადგენელთა პალატაზე კონტროლი მოიპოვეს, ტელეკომპანიები CNN-ი, NBC-ი და CBS-ი ავრცელებენ. შედეგების შეჯამება ჯერ კიდევ გრძელდება და ვარაუდობენ, რომ საბოლოო ჯამში, რესპუბლიკელებს 221-223 მანდატი ექნებათ.

კონგრესის წარმომადგენელთა პალატაში რესპუბლიკელების ლიდერმა კევინ მაკკარტიმ, რომელიც პალატის თავმჯდომარის თანამდებობაზე დემოკრატ ნენსი პელოსის პოტენციური შემცვლელია, ტვიტერზე დაწერა, რომ რესპუბლიკელებმა წარმომადგენელთა პალატა ოფიციალურად გადააბრუნეს. მაკარტის თანახმად, ამერიკელები მზად არიან ახალი მიმართულებისთვის და რესპუბლიკელები მზად არიან მას მისდიონ.

აშშ-ის დემოკრატმა პრეზიდენტმა ჯო ბაიდენმა კევინ მაკკარტის მიულოცა მისი პარტიის გამარჯვება და განაცხადა, რომ მზად არის წარმომადგენელთა პალატაში რესპუბლიკელებთან ერთად იმუშაოს ამერიკელების საკეთილდღეოდ.

შუალედური არჩევნები 8 ნოემბერს ჩატარდა. ამერიკელებმა აირჩიეს კონგრესის წარმომადგენელთა პალატის 435-ივე და სენატის 100-დან 35 წევრი. სენატში უმრავლესობა შეინარჩუნა პრეზიდენტ ჯო ბაიდენის დემოკრატიულმა პარტიამ.

როგორც ამერიკული მედია წერს, მიუხედავად იმისა, რომ კონგრესის წარმომადგენელთა პალატაში რესპუბლიკელთა რაოდენობრივი უპირატესობა უმნიშვნელო იქნება, მათ მიერ უმრავლესობის მოპოვება შეაფერხებს პრეზიდენტ ბაიდენის ადმინისტრაციის დღის წესრიგის განხორციელებას მომდევნო ორი წლის განმავლობაში. 2024 წელს აშშ-ში საპრეზიდენტო არჩევნები ჩატარდება.

თეთრ სახლში დაბრუნება გადაწყვიტა რესპუბლიკელმა დონალდ ტრამპმა, რომელმაც 15 ნოემბერს ოფიციალურად გამოაცხადა, რომ მომდევნო არჩევნებში კენჭს იყრის.

აშშ-ის დემოკრატმა პრეზიდენტმა ჯო ბაიდენმა არაერთხელ განაცხადა მეორე ვადით კენჭისყრის განზრახვის შესახებ, თუმცა, საბოლოო გადაწყვეტილება ჯერჯერობით არ მიუღია.