კრამატორსკზე რუსეთის სარაკეტო დარტყმის შედეგად დაღუპულთა რიცხვი 8-მდე გაიზარდა

მსოფლიო ივნისი 28 2023 font size შრიფტის დაპატარავება increase font size

უკრაინელმა მაშველებმა დონეცკის ოლქის ქალაქ კრამატორსკში, რუსული რაკეტით განადგურებული შენობის ნანგრევებში იპოვეს კიდევ 4 ადამიანის ცხედარი. დაღუპულთა რიცხვი 8-მდე გაიზარდა. მათ შორის 3 ბავშვია. საგანგებო სიტუაციების სამსახურის ინფორმაციით, დაჭრილია 56 ადამიანი.

უკრაინის ხელისუფლების ინფორმაციით, 27 ივნისს, საღამოს, ერთი რაკეტა მოხვდა ქალაქის ცენტრში მდებარე კაფეს, მეორე კი, კრამატორსკთან მდებარე სოფელ ბელენკოეში ჩამოვარდა. დაზიანებულია სახლები და სავაჭრო ობიექტები.

კრამატორსკში დაჭრილებს შორის 3 კოლუმბიის მოქალაქეა. BBC-ს ლათინურ ამერიკაში უკრაინის მხარდამჭერი ორგანიზაციიდან(Aquanta Ucraina) აცნობეს, რომ დაიჭრნენ ორგანიზაციის დამფუძნებელი, კოლუმბიელი დეპუტატი სერხიო ხარამილიო, მწერალი ეკტორ აბადი და ჟურნალისტი კატალინა გომესი. დაჭრილია მათი თანმხლები უკრაინელი მწერალი ვიქტორია ამელინაც, რომლის მდგომარეობა მძიმეა.

უკრაინის პრეზიდენტმა ვოლოდიმირ ზელენსკიმ კრამატორსკზე სარაკეტო დარტყმას უწოდა ტერორის კიდევ ერთი გამოვლინება, რომელიც უკრაინას და მსოფლიოს აჩვენებს, რომ რუსეთი იმსახურებს მხოლოდ დამარცხებას და ტრიბუნალს.

წაკითხვა 368 ჯერ