სახელმწიფო დეპარტამენტი არ აკონკრეტებს რუსეთის მიერ უკრაინაში ქლორპიკრინის გამოყენების დროს და ადგილს, თუმცა აღნიშნავს, რომ მსგავსი ქიმიური ნივთიერებების გამოყენება ერთეული შემთხვევა არ არის და მიზნად ისახავს უკრაინელი სამხედროების განდევნას საბრძოლო მოქმედებების ზონაში დაკავებული პოზიციებიდან.

რუსეთის მიერ უკრაინაში ქლორპიკრინის გამოყენებაზე საუბარია სახელმწიფო დეპარტამენტის ოფიციალურ განცხადებაში, რომელიც ეხება რუსეთის საწინააღმდეგო ახალი სანქციების ამოქმედებას. ამერიკის შეერთებულმა შტატებმა 1 მაისს გამოაცხადა, რომ რუსეთის აგრესიის და შიდა რეპრესიების გამო სანქციები დაუწესა 280-ზე მეტ ფიზიკურ და იურიდიულ პირს.

სანქცირებულთა შორის არიან რუსეთის სამი სახელმწიფო სტრუქტურა და ოთხი კომპანია, რომლებსაც კავშირი აქვთ ქიმიური და ბიოლოგიური იარაღის შექმნის პროგრამასთან. მათ შორისაა რუსეთის თავდაცვის სამინისტროს რადიაციული, ქიმიური და ბიოლოგიური დაცვის ძალები.

უკრაინაში ქიმიური ნივთიერება ქლორპიკრინის გამოყენებასთან დაკავშირებულ ბრალდებაზე რუსეთს ჯერჯერობით არაფერი უთქვამს.

ქლორპიკრინი კანს და ლორწოვან გარსს აზიანებს, მაღალი კონცენტრაციით გამოყენების შემთხვევაში კი დიაფრაგმის კონვულსიას იწვევს. ეს ნივთიერება საბრძოლო იარაღად პირველად გერმანელმა სამხედროებმა გამოიყენეს პირველი მსოფლიო ომის დროს.