გამოცემა ამერიკელ და ნატო-ს ოფიციალურ პირებზე დაყრდნობით იუწყება, რომ ვაშინგტონი და ბერლინი არ ჩქარობენ, მხარი დაუჭირონ კიევის ბლოკში გაწევრიანების მიწვევას. თუმცა, აშშ-სა და გერმანიის გარდა, ნატოს წევრი, სულ მცირე, ხუთი ქვეყანა ბლოკავს ამ საკითხს.

შეგახსენებთ, რომ ნატო-ში უკრაინის მიწვევა ზელენსკის ახლახან გამოცხადებულ “გამარჯვების გეგმაში” შედის.

გამოცემის ინფორმაციით, ალიანსის ერთ-ერთმა ოფიციალურმა პირმა განაცხადა, რომ ისეთი ქვეყნები, როგორიცაა ბელგია, სლოვენია ან ესპანეთი, აშშ-სა და გერმანიის უკან იმალებიან, ეს ქვეყნები აბსტრაქტულად მხარს უჭერენ უკრაინის მიწვევას, მაგრამ როგორც კი საკითხი განხორციელებას მიუახლოვდება, ისინი უფრო საჯაროდ დაიწყებენ ამ იდეის უარყოფას.

Politico-ს ინფორმაციით, გაწევრიანებას ეწინააღმდეგებიან უნგრეთი და სლოვაკეთიც, რადგან მათი ამჟამინდელი ლიდერები, ძირითადად, რუსეთის პროპაგანდას იცავენ.

“თუმცა, ოფიციალური პირები, რომლებიც POLITICO-ს ესაუბრებოდნენ, ცდილობდნენ ხაზი გაესვათ, რომ არც აშშ და არც გერმანია ალიანსში უკრაინის საბოლოოდ გაწევრიანებას არ გამორიცხავენ”, – აღნიშნავს გამოცემა.