DW-ს ცნობით, კანცლერმა ოლაფ შოლცმა ეკონომიკურ რეფორმებთან დაკავშირებული უთანხმოების გამო ფინანსთა მინისტრი კრისტიან ლინდნერი თანამდებობიდან გაათავისუფლა.

კოალიციაში კრიზისი ლინდნერის თავისუფალი დემოკრატიული პარტიის (FDP) ულტიმატუმმა გამოიწვია. FDP ლიბერალური ეკონომიკური რეფორმების გატარების მიმართულებით შოლცის სოციალ-დემოკრატიული პარტიისა და “მწვანეებისგან” დათმობაზე წასვლას ითხოვდა, რაზედაც მხარეები ვერ შეთანხმდნენ.

მედიის ცნობით, მიუხედავად იმისა, რომ შოლცს შეუძლია გააგრძელოს მართვა, უმცირესობაში დარჩენილი პარტია ბიუჯეტის დამტკიცებას ვერ შეძლებს, რაც დიდი ალბათობით, ვადამდელ არჩევნებს ნიშნავს.

როგორც წესი, ბუნდესტაგის არჩევნები ოთხ წელიწადში ერთხელ ტარდება. თუმცა, განსაკუთრებულ კრიზისულ პოლიტიკურ სიტუაციებში, მაგალითად, იმ შემთხვევაში თუ კანცლერის მხარდაჭერა პარლამენტში შესუსტდება, შესაძლოა, უფრო ადრე დაინიშნოს.

როგორც DW წერს, გერმანიაში ვადამდელი საპარლამენტო არჩევნები ძალზე იშვიათი მოვლენაა.