რუსეთის პრეზიდენტის თქმით, უკრაინის საკითხზე 2022 წელს შეთანხმება იქნა მიღწეული, თუმცა ბორის ჯონსონმა, რომელიც 2022 წელს ბრიტანეთის პრემიერ-მინისტრის პოსტს იკავებდა, დაარწმუნა კიევი, გაეგრძელებინა ბრძოლა.

პუტინის თქმით, რუსეთი მზადაა, ხელი მოაწეროს სამშვიდობო შეთანხმებებს უკრაინის ნებისმიერ ლეგიტიმურ ხელისუფლებასთან, თუნდაც ვოლოდიმირ ზელენსკისთან, მაგრამ ასევე აღნიშნა, რომ კიევის ამჟამინდელი ხელისუფლება უკანონოა და ერთადერთი კანონიერი ორგანო უკრაინაში არის რადა.

რუსეთის პრეზიდენტის განცხადებით, უკრაინაში ოპერაციის დაწყების გადაწყვეტილება 2022 წლამდე უნდა მიეღო და ამისთვის წინასწარ უნდა მომზადებულიყო.

„უნდა ითქვას, რომ სიტუაცია მკვეთრად იცვლება. მოძრაობა ფრონტის მთელ ხაზზე ყოველდღიურად მიმდინარეობს. ჩვენ არ ვსაუბრობთ 100, 200 ან 300-მეტრზე წინსვლაზე. ჩვენი მებრძოლები ყოველდღიურად იკავებენ ტერიტორიას კვადრატულ კილომეტრებში, მინდა ხაზგასმით აღვნიშნო – ყოველდღე. საბრძოლო მოქმედებები რთული საქმეა და ამიტომ რთული და აზრსმოკლებულია გამოცნობა, რა გველის წინ, მაგრამ ეს არის ზუსტად ის, რაც ხდება. ჩვენ კი მივდივართ ჩვენი უპირველესი ამოცანების მიღწევისკენ, რაც სპეციალური სამხედრო ოპერაციის დასაწყისში დავასახელეთ“, – განაცხადა ვლადიმერ პუტინმა.