ჩვენ ვართ ალბათ, ერთ-ერთი ქვეყანა, ევროპაში იმ ცოტა ქვეყნიდან, სადაც ზელენსკის პარლამენტში სიტყვით გამოსვლის საშუალება არ მიეცა. ეს ხომ არაფერს ითხოვს სხვას, გარდა ტოტალური, მორალური სოლიდარობისა, უნდა მოგვეწვია ზელენსკი საქართველოს პარლამენტში, – ამის შესახებ საქართველოს პრეზიდენტმა სალომე ზურაბიშვილმა „პალიტრანიუსის“ ეთერში განაცხადა.
როგორც სალომე ზურაბიშვილმა აღნიშნა, ქვეყანამ, ხალხმა უკრაინას სრული სოლიდარობა გამოუცხადა.
„არ შეიძლება ამ ქვეყნის მიმართ მთლიანად სოლიდარული არ ვიყოთ, რომელიც დღეს არის იმავე პირობებში უფრო ხანგრძლივად, რომელშიც ჩვენ ვიყავით. უკრაინამ მსოფლიოს ბრძოლის, შემართების, თანმიმდევრობისა და გამძლეობის დიდი მაგალითი უჩვენა. ამას ქართველები რომ უყურებენ, აფასებენ. არავინ გვთხოვს იმას, რაც ჩვენს ძალებს აღემატება, მაგრამ გვევალება მორალური სოლიდარობა.
ერთ მაგალითს გეტყვით, ჩვენ ვართ ალბათ ერთ-ერთი ქვეყანა, ევროპაში დარჩენილი იმ ცოტა ქვეყნიდან, სადაც ზელენსკის პარლამენტში სიტყვით გამოსვლის საშუალება არ მიეცა. ეს ხომ არაფერს ითხოვს სხვას გარდა ტოტალური, მორალური სოლიდარობისა? ასევე, მგონია, რომ 26 მაისს, დღეს, რომელიც ევროინტეგრაციის ეგიდის ქვეშ იყო ჩატარებული, პარლამენტის ფასადზე, სადაც იყო ევროპული დროშა, ქართული დროშა, შეიძლება ყოფილიყო უკრაინისა და მოლდოვას დროშა. უკრაინა არის მთავარი დღევანდელი მიზეზი რატომაც არის ეს პროცესი აჩქარებული, ალბათ ეს ჩვენ უნდა ვაღიაროთ და ვიცოდეთ, როგორ ვიყოთ მადლიერი“, – განაცხადა სალომე ზურაბიშვილმა.
ამასთან, სალომე ზურაბიშვილმა აღნიშნა, რომ მეორე ფრონტის საფრთხე არ არსებობს.
„არ არსებობს მეორე ფრონტის საფრთხე, არ არსებობს ომის პარტია, თუ პარტიები საქართველოში, მაგრამ ეს არ ნიშნავს, რომ ჩვენ არ შეგვიძლია, ვიყოთ უკრაინასთან მორალურად სოლიდარული.
ჩვენ რატომღაც საჭიროდ ვთვლით უარი ვთქვათ ისეთ რაღაცებზე, რაზეც არ არის მოთხოვნა ჩვენთან დაკავშირებით. არ მესმის, ეს რატომ არის საჭირო, რომ ჩვენ წინსწრებით რაღაცებს ვაცხადებდეთ? ჩვენზე დამატებითი სანქციების მოთხოვნა არ არის. არ არის მოთხოვნა ჩვენი პარტნიორებისგან მეორე ფრონტის გახსნაზე. ჩვენი მეგობრებიდან, არ წამოსულა ასეთი მოთხოვნა. არ მგონია, ვინმე იყოს ამ ქვეყანაში ომის მომხრე. ეს თემა ძალიან დამაზიანებელია ჩვენთვის. ვიცით, რომ მეორე ფრონტის გახსნის არც საშუალება და არც სურვილი არ გვაქვს, რადგან ჩვენ სხვა პოლიტიკა გვაქვს ოკუპირებული ტერიტორიების მიმართ, არ არის საჭირო ამ თემით მანიპულირება“, – აღნიშნა სალომე ზურაბიშვილმა.
