მისი თქმით, საქართველოს პრეზიდენტის, სალომე ზურაბიშვილის, იმპიჩმენტის წესით თანამდებობიდან გადაყენების საკითხის განხილვა ოთხშაბათს და ხუთშაბათს იგეგმებოდა, თუმცა ოპოზიციონერი დეპუტატის დამაზუსტებელი შეკითხვების შემდეგ პარლამენტის სპიკერმა დაადასტურა, რომ იმპიჩმენტის საკითხის განხილვას პარლამენტი დაიწყებს ხვალ, 18 ოქტომბერს, 12:00 საათზე.

„ხვალ დილით, 12 საათზე დავიწყოთ ამ საკითხის განხილვა. გიდასტურებთ, რომ ხვალ 12 საათზე გთხოვთ მობრძანდეთ და დავიწყებთ ამ პროცედურას“, - განაცხადა შალვა პაპუაშვილმა.

იმპიჩმენტის საკითხის განხილვაში მონაწილეობის სურვილი დადასტურებული აქვს საქართველოს პრეზიდენტს, სალომე ზურაბიშვილს. შალვა პაპუაშვილმა განაცხადა, რომ მას ამის შესაძლებლობა ექნება.

“საქართველოს პრეზიდენტსაც ექნება შესაძლებლობა ამ განხილვაში როგორც თანამომხსენებელმა მიიღოს მონაწილეობა და გამოვიდეს თანამომხსენებლის რანგში“, - თქვა პაპუაშვილმა.

რაც შეეხება საკითხის განხილვის პროცედურას, პარლამენტის თავმჯდომარის განმარტებით, ეს არის კანონპროექტის პირველი მოსმენით განხილვის მსგავსი - მომხსენებელი, ამ შემთხვევაში საკონსტიტუციო სასამართლოში პრეზიდენტის იმპიჩმენტის წარდგინების ავტორებიდან ერთ-ერთი, გამოვა და წარმოადგენს პოზიციას. შემდეგ რეგლამენტით გათვალისწინებულია, რომ პარლამენტს განხილვაში მონაწილეობის მისაღებად შეუძლია მოიწვიოს შესაბამისი თანამდებობის პირი, ამ შემთხვევაში, საქართველოს პრეზიდენტი. იგი გამოვა როგორც თანამომხსენებელი. სხდომაზე კითხვებისა და დაზუსტებების შესაძლებლობა იქნება როგორც მომხსენებელთან, ისე თანამომხსენებელთან. პაპუაშვილის თქმით, ვინაიდან რაიმე დარგობრივი მოსაზრებები ამ შემთხვევაში არ არის რელევანტური, არ იქნება კომიტეტის გამოსვლები.

"გადავალთ უკვე უფრაქციო წევრების, პოლიტიკური ჯგუფებისა და ფრაქციების გამოსვლებზე და ამის შემდეგ დასკვნით სიტყვის უფლება ექნება მომხსენებელს, თუმცა არა თანამომხსენებელს. ეს იქნება პროცედურა, საბოლოო ჯამში, რომლის განხილვის შემდეგ იქნება კენჭისყრა. იცით, რომ 100 ხმა იქნება საჭირო", - განაცხადა შალვა პაპუაშვილმა.

16 ოქტომბერს საქართველოს საკონსტიტუციო სასამართლომ გამოაცხადა, რომ ევროკავშირის სამ ქვეყანაში მთავრობის თანხმობის გარეშე მოგზაურობით სალომე ზურაბიშვილმა ქვეყნის კონსტიტუცია დაარღვია.

1 სექტემბერს გახდა ცნობილი, რომ მმართველი პარტია იწყებდა საქართველოს პრეზიდენტის იმპიჩმენტის პროცედურას. საპარლამენტო უმრავლესობის 80 დეპუტატის სახელით საკონსტიტუციო წარდგინება სასამართლოში 14 სექტემბერს შევიდა.

საკონსტიტუციო სასამართლოს პლენუმს საკითხის განსახილველად და დასკვნის მოსამზადებლად კონსტიტუცია 1-თვიან ვადას აძლევდა. პრეზიდენტის იმპიჩმენტის პარლამენტში კენჭისყრაზე გასატანად აუცილებელი იყო სასამართლოს უარყოფითი დასკვნა (9 მოსამართლიდან 6-ის თანხმობა). ამის შემდეგ საკითხი კენჭისყრაზე ორი კვირის ვადაში დგება - პრეზიდენტის გადასაყენებლად საჭიროა 100 დეპუტატის ხმა, რაც მმართველ პარტიას დღევანდელი მდგომარეობით არ აქვს.