"სტიქიის ზონიდან 296 ოჯახია გადაყვანილი, მზადდება სათანადო დოკუმენტაცია კომპენსაციებზე" - ირაკლი კობახიძე
სტიქიის ზონიდან 296 ოჯახია გადაყვანილი, მზადდება სათანადო დოკუმენტაცია კომპენსაციების გაცემაზე, საჭიროების შემთხვევაში, ამისათვის ცენტრალური ბიუჯეტიდანაც იქნება გამოყოფილი თანხები, რესურსები, – ამის შესახებ საქართველოს პრემიერ-მინისტრმა, ირაკლი კობახიძემ მთავრობის სხდომაზე განაცხადა.
პრემიერ-მინისტრმა კიდევ ერთხელ მიუსამძიმრა სტიქიის შედეგად დაღუპული 14 ადამიანის ოჯახის წევრებსა და ახლობლებს.
კობახიძემ სტიქიის ზონაში, სალიკვიდაციო სამუშაოებში ჩართულ შესაბამის უწყებებს გაწეული სამუშაოებისთვის მადლობა გადაუხადა.
„გასული კვირა იყო ძალიან მტკივნეული ჩვენთვის. სტიქიამ იმსხვერპლა 14 ადამიანის სიცოცხლე. კიდევ ერთხელ გამოვთქვამ სამძიმარს დაღუპულთა ოჯახის წევრების მიმართ, ახლობლების მიმართ. ადგილზე გავეცანი სტიქიის სალიკვიდაციო სამუშაოებს და მინდა, აღვნიშნო, რომ როგორც სახელმწიფო უწყებებმა, ასევე ადგილობრივი ხელისუფლების წარმომადგენლებმა გააკეთეს ძალიან ბევრი რამ, იმოქმედეს ძალიან სწრაფად. ძალიან მალე აღდგა ელექტროენერგიის მიწოდება, ასევე ბუნებრივი აირის მიწოდება ასეულობით სოფლისთვის, სადაც იყო პრობლემა სტიქიის გამო. ძალიან სწრაფად გაიწმინდა საავტომობილო გზები. აღდგა საავტომობილო მოძრაობა შესაბამის მონაკვეთებზე.
400 საცხოვრებელი სახლი იყო დაახლოებით დატბორილი, საიდანაც 300-ზე მეტ შემთხვევაში დასრულდა ამოტუმბვის სამუშაოები. საბოლოოდ დასკვნის მომზადებამდე, უსაფრთხო ადგილზე გადაყვანილია 296 ოჯახი. ასევე შეფასდა ზარალი. მზადდება სათანადო დოკუმენტაცია იმისთვის, რომ გაიცეს კომპენსაციები შესაბამის ოჯახებზე. საჭიროების შემთხვევაში ამისათვის ცენტრალური ბიუჯეტიდანაც იქნება გამოყოფილი თანხები, რესურსები.
მინდა, მადლობა გადავუხადო შესაბამის სამინისტროებს, ვინც იყო ჩართული სტიქიის სალიკვიდაციო სამუშაოებში, ეს არის ინფრასტრუქტურის სამინისტრო, შინაგან საქმეთა სამინისტრო, გარემოს დაცვის სამინსტრო. ასევე მადლობა მთავრობის ადმინისტრაციის რეგიონულ დეპარტამენტს, ადგილობრივი ხელისუფლების წარმომადგენლებს, მაშველებს, ყველას, ვინც ამ სამუშაოებში იყო ჩართული“,- განაცხადა ირაკლი კობახიძემ.
სიახლეები
- უცხოური ვალუტის ოფიციალური კურსი 27 ივლისისთვის
- "ახალგაზრდებო, ვინც რუსი ტურისტების ავტობუსს კვერცხებს ესროდით, რადიკალებმა პოზიცია შეცვალეს და უნდა გადაყლაპოთ, რომ ამ ნაბიჭვრებმა გამოგიყენეს?!"
- "ჩვენ ყველანაირი რესურსი გვაქვს, რომ ასეთ გეგმებს დავუპირისპირდეთ" - ირაკლი კობახიძე ტერორიზმის საფრთხეზე
- იმერეთში სახელმწიფო რწმუნებულმა ზვიად შალამბერიძემ საკონსულტაციო საბჭოს სხდომა გამართა
- "ღმერთმა არ ქნას, საქართველოს გადასარჩენად ყველაფრის თქმა მოგვიწიოს - არსებობს საკითხები, რაზეც არ ვლაპარაკობთ, რომ წითელი ხაზები არ გადავლახოთ"