"იყო მთელი რიგი სპეკულაციები ამ თემასთან დაკავშირებით. ყველაფერს აქვს თავისი პლუს-მინუსები... საბოლოო ჯამში, მე მიმაჩნია, რომ ღობის არარსებობას აქვს მეტი პლუსი, ვიდრე მინუსი და ეს გახდა სწორედ ჩემი გადაწყვეტილების საფუძველი", - თქვა ირაკლი კობახიძემ.ირაკლი ღარიბაშვილმა სპეკულაცია უწოდა 200 000 ლარის "გადაყრას" და აღნიშნა, რომ რკინის კონსტრუქციას საგანმანათლებლო დაწესებულებას გადასცემენ, მთავრობისთვის დამატებითი ხარჯი კი მხოლოდ ჯებირის მონტაჟი და მისი მოხსნაა.

ღობესთან დაკავშირებით ყოფილ პრემიერ-მინისტრს, ირაკლი ღარიბაშვილს, ჟურნალისტებმა ჰკითხეს 9 მარტს - ჯებირების დემონტაჟიდან მეორე დღეს. მისი თქმით, ღობის გაკეთების მიზანი უსაფრთხოება იყო.

"დამისახელეთ ქვეყანა, რომლის მთავრობის მეთაური ზის დაუცველ ღობის გარეშე შენობაში... [დესტრუქციული ძალები] გმირ პოლიციელებს როგორ შეურაცხყოფდნენ კანცელარიის წინ - ხან ფქვილი დააყარეს, ხან საღებავი შეასხეს და ჩვენს თანამშრომლებს, მთავრობის ადმინისტრაციის თანამშრომლებს, როგორ აწუხებდნენ - შიგნით შეცვივდებოდნენ ყოველგვარი საშვების გარეშე და დესტრუქციას აწყობდნენ და საშინელებებს სჩადიოდნენ", - თქვა 9 მარტს ირაკლი ღარიბაშვილმა.

2023 წლის 7 აპრილს, რეაბილიტაციის ფარგლებში, მთავრობის ადმინისტრაციასთან სკვერის მოსაწყობად სამუშაოები მოულოდნელად დაიწყეს იმჟამინდელი პრემიერ-მინისტრის, ირაკლი ღარიბაშვილის ბრძანებით. 11 თვის თავზე კი, ირაკლი კობახიძის პრემიერ-მინისტრობის დროს, ღობის დემონტაჟი დაიწყეს.