მისივე თქმით, ცუდი და უმძიმესია ის, რაც უკრაინაში ხდება.

„ხომ არ გგონიათ, რომ იმ კონკრეტულმა ტელევიზიებმა მიიღეს ეს გადაწყვეტილება? დაავალეს და უთხრეს, ხომ?! ჰერჩინსკის საშუალებით გააჟღერეს ეს დამოკიდებულება, თუ როგორი ცუდია ეს ბანერები. რა არის იმ ბანერებზე? რეალობაა აღბეჭდილი, ხომ?! რა თქმა უნდა, ცუდი და უმძიმესია ის, რაც უკრაინაში ხდება - ის შედეგები, რაც ამ ომმა მოიტანა. მაგას ვამბობთ ჩვენ, რომ არ გვინდა ომი და მეორე ფრონტი, რომელზეც მოწოდებები კეთდებოდა. ის არასამთავრობო ორგანიზაციები, რომლებიც გამოდიოდნენ და ამბობდნენ, ბომბები ცვიოდეს ქვეყანაშიო, ვინ არიან? ვისი დაფინანსებულია? ვის „მესიჯებს“ აჟღერებდნენ? ხალხს კიდევ ერთხელ უნდა შევახსენოთ, რა არის ერთ მხარეს და რა არის მეორე მხარეს, რათა არჩევანის გაკეთება მარტივი იყოს“, - განაცხადა კახა კალაძემ.

კალაძის შეფასებით, რამდენიმე ტელევიზიის მიერ მმართველი გუნდის საარჩევნო ვიდეო-რგოლის გაშვებაზე უარის თქმას სამართლებრივი და დასაბუთებული არგუმენტი სჭირდება.

„საარჩევნო კამპანიის დროს კონკრეტულ ვიდეო-რგოლს რომ არ უშვებს ტელევიზია, ამას საფუძვლები სჭირდება. კონკრეტული არგუმენტები სჭირდება და არა ევროკავშირის ელჩის გამოსვლა და განცხადება, რომ „უიმე, რა ცუდია, მე არ მომწონს“. ეს არის სწორი დამოკიდებულება? რა თქმა უნდა, ეს არ არის საკმარისი. ამიტომ გეუბნებით, მონობას დაანებეთ თავი და ღირსეულები იყავით. ზოგად კონტექსტში ვამბობ - მონობა კატეგორიულად მიუღებელია. ქართველები ვართ, ამაყები ვართ და ვიღაცამ რაღაც გვიბრძანოს, არაა სწორი. ამ ყველაფერს სჭირდება სამართლებრივი და იურიდიული არგუმენტები, რომელიც არ არსებობს. ჩვენ რაღაცას ხომ არ ვიგონებთ?! კონკრეტულ ფაქტებზეა გამახვილებული ყურადღება, რომ არ გვინდა ის მდგომარეობა მივიღოთ, რაც სამწუხაროდ, უკრაინაში ხდება. იმიტომ, რომ ვიცით რა შედეგები მოაქვს ომს“, - განაცხადა თბილისის მერმა.