" მე ვმღერი, მე ვიმღერებ! - ყოველ კვირას რუსეთში რომ დადიხარ, რა ევროპულ მომავალზე გველაპარაკებიან?! " - კახა კალაძე „მგზავრების“ გადაწყვეტილებაზე
მე ვმღერი, მე ვიმღერებ! - ასე უპასუხა თბილისის მერმა, კახა კალაძემ ჟურნალისტის კითხვას, 20 ოქტომბერს თბილისის მერიის მიერ დაგეგმილ ღონისძიებაზე, მომღერლებიდან ვინ მიიღებს მონაწილეობას.
„20 ოქტომბერს იქნება ძალიან საინტერესო ღონისძიება. შეგიძლიათ მობრძანდეთ, ნახავთ, რა მაგარი პროექტი გამოვიდა და საკმაოდ სასიამოვნო საღამო ელოდება იქ მოსულ საზოგადოებას“, - განაცხადა კალაძემ.
როგორც კალაძემ განმარტა, ჯგუფი „მგზავრების“ მდგომარეობაში შედის და მათი გადაწყვეტილება კონცერტის გაუქმებასთან დაკავშირებით, ესმის.
„ხაზი მინდა გავუსვა იმას, რომ რა თქმა უნდა, საქართველოს მომავალი ეს არის ევროპა და თუ რამე წარმატება გვაქვს ევროინტეგრაციის გზაზე მიღწეული, ეს „ქართული ოცნების“ ხელისუფლების პირობებშია. შესაბამისად, ეს განცხადებები ჩვეულებრივ ფარისევლურია, ეს გადაწყვეტილება რბილად რომ ვთქვათ, ძალიან ცუდი იყო პირველ რიგში მათთვის, თორემ ამით რა დამიშავდა, ან იქ მისულ ადამიანებს ამით რა დაუშავდებათ. თქვენ თუ დააკვირდით, ყველა შეურაცხყოფას აყენებდა ამ ადამიანებს თავიანთი ქმედებებიდან გამომდინარე. ღირსება არ უნდა დაკარგო, სადაც არ უნდა იყო, როგორც არ უნდა იყო. რატომ არის ფარისევლობა - ყოველ კვირას რუსეთში რომ დადიხარ და რუბლებს რომ იღებ, რა ევროპაზე გველაპარაკებიან, რა ევროპულ მომავალზე გველაპარაკებიან. ერთი სიტყვა არ უხსენებიათ ოკუპაციასთან დაკავშირებით, ერთი სიტყვა, რადგან თუ ამას ახსენებენ, იქ აღარავინ არ შეუშვებს, ალბათ.
ეს ყველაფერი შეთანხმებული იყო და იმ ზეწოლის შედეგად გააუქმეს, ეს ჩვეულებრივ ფაშიზმია, ეს ლიბერალიზმი რაც არის, ფაშისტური ქმედებები, ვნახეთ რა განცხადებებს აკეთებდნენ, რა შეურაცხყოფებს აყენებდნენ, არ გავიმეორებ, ერთ-ერთმა მათგანმა რა შეურაცხყოფები მიაყენა, პირდაპირ აგინებდნენ, მაგრამ ჩვენ ამ ადამიანებსაც გავათავისუფლებთ. „მგზავრების“ მდგომარეობაში გულწრფელად გეუბნებით, შევდივარ და მესმის, იმ წნეხში, იმ ზეწოლაში, იმ ბულინგში, სადაც ისინი იმყოფებიან, შეიძლება ბევრი ჩვენი თანამოქალაქე იყოს. 26 ოქტომბერს ყველას გავათავისუფლებთ და ქვეყანაში იქნება მშვიდობა, ყველას ექნება შესაძლებლობა თავისი გადაწყვეტილების შესაბამისად იმოქმედოს, გააკეთოს ვისაც, რა სურს და არა მაქარაშვილებს, ფერაძეებს და მსგავსი ტიპის ტიპის ელემენტებს როგორც უნდათ“, - განაცხადა კალაძემ.
სიახლეები
- სამწუხაროა, რომ „მგზავრებმა“ ვერ გაუძლო ლიბერალური ფაშიზმის წარმომადგენელთა ბულინგს, პარკის გახსნა შედგება და თბილისელები ამ მნიშვნელოვან მოვლენას სათანადოდ აღნიშნავენ - თბილისის მერია
- კულტურისა და სპორტის მინისტრად თინათინ რუხაძე დაინიშნა
- " საქართველოში არსებული ვითარების გამო შეშფოთება გამოვხატეთ - მთავრობის მიერ გადადგმული ნაბიჯები, ფაქტობრივად, გაწევრიანების პროცესის შეჩერებას იწვევს " - ემანუელ მაკრონი
- ცესკოს შენობასთან რკინის ღობეები პრევენციისთვის აღიმართა, რადგან გვახსოვს წინა წლების პრაქტიკა - გიორგი კალანდარიშვილი
- ამომრჩეველთა საერთო რაოდენობა 3 508 294 ადამიანს შეადგენს - ერთიან სიაზე მუშაობა დასრულდა