რომან გოცირიძე ანაკლიის ნავსადგურთან დაკავშირებით ახალი ინიციატივით გამოდის
ოპოზიციონერი დეპუტატი რომან გოცირიძე გამოდის ინიციტივით, რომლის მიხედვით, ანაკლიის საზღვაო ნავსადგურზე, გარკვეული დროით, წილების 50%-ზე მეტის ფლობა მხოლოდ საქართველოს სახელმწიფოს შეეძლება, რუსეთის ფედერაციასთან დაკავშირებულ სუბიეტებს კი, ანაკლიის პორტში წილის ფლობა აეკრძალებათ.
გოცირიძის მიერ მომზადებული კანონის პროექტის გათვალისწინებით, ანაკლიის საზღვაო ნავსადგურის მშენებლობის პირველი ფაზის დასრულებისა და ექსპლუატაციაში შესვლამდე, ნავსადგურის წილის 50%-ზე მეტის ფლობელი მხოლოდ საქართველოს სახელმწიფო იქნება. ამავე პროექტით, რუსეთის ფედერაციის რეზიდენტი ფიზიკური, იურიდიული პირი და რუსეთის ფედერაციის კანონმდებლობით გათვალისწინებული სხვა ორგანიზაციული წარმონაქმნი, ასევე ნებისმიერი ქვეყნის ფიზიკური, იურიდიული პირი და სხვა ორგანიზაციული წარმონაქმნი, რომელიც პირდაპირ ან ირიბად რუსეთის ფედერაციასთან არის დაკავშირებული, ნავსადგურის წილის მფლობელი ვერ გახდება.
გოცირიძის განცხადებით, მაშინ როდესაც ქვეყნის კონსტიტუცია უმაღლეს ორგანოებს ევროატლანტიკური მისწრაფებების შესახებ ნაბიჯების გადადგმას ავალდებულებს, სხვა არადემოკრატიული სახელმწიფოების მხრიდან სტრატეგიულად მნიშვნელოვან ობიექტებზე გავლენის ქონა ჩვენი ქვეყნის სუვერენიტეტსა და ევროატლანტიკურ მისწრაფებებს უქმნის საფრთხეს.
“რუსეთის უკრაინაში შეჭრის შემდეგ, საქართველოს ხელისუფლების ანტიდასავლური განცხადებებისა და პარლამენტის მიერ “უცხოური გავლენის გამჭვირვალობის შესახებ” კანონის მიღების ფონზე, მმართველი პარტიის მიერ გადადგმული ნაბიჯები ქვეყანაში რუსული გავლენების გაზრდის საფრთხეს აჩენს.
კანონპროექტის მიზანია საკანონმდებლო შეზღუდვის შემოღება იმისთვის, რომ ანაკლიის საზღვაო ნავსადგურში წილობრივი მონაწილეობა ვერ შეძლონ რუსეთის ფედერაციის რეზიდენტმა ფიზიკურმა, იურიდიულ პირებმა და რუსეთის ფედერაციის კანონმდებლობით გათვალისწინებულმა სხვა ორგანიზაციულმა წარმონაქმნებმა. გარდა ამისა, ინიციატივის მიზანია ანაკლიის ნავსადგურზე საქართველოს სახელმწიფოს წილობრივი უპირატესობის საკანონმდებლო უზრუნველყოფა განსაზღვრული დროით - აღნიშნული შეზღუდვა იმოქმედებს ანაკლიის საზღვაო ნავსადგურის მშენებლობის პირველი ფაზის დასრულებისა და ექსპლუატაციაში შესვლამდე“, - განმარტავს საკანონმდებლო ინიციატივის ავტორი.
სიახლეები
- " საქართველოს ხელისუფლების ბოლოდროინდელი ანტიდემოკრატიული ქმედებები არც საქართველოსა და არც ქართველ ხალხს არ ეხმარება " - რობინ დანიგანი
- გერმანიის საგარეო საქმეთა სამინისტრო - მოვუწოდებთ საქართველოს კურსი შეცვალოს!
- სალათა ხორცითა და მაკარონით
- " ბიძინა ივანიშვილი აშშ-ს ან ევროკავშირს რით უნდა დაემუქროს? - ემუქრება იმით, რომ საქართველოს, რომელიც მძევლად ჰყავს აყვანილი, რუსეთისკენ წაიყვანს და ჩააბარებს" - რომან გოცირიძე
- ბორელი საქართველოს მოუწოდებს, გაიწვიოს ლგბტ უფლებების შემზღუდავი კანონი