პროექტის ქვეპროგრამის ბენეფიციარები სოციალურად დაუცველი და კრიზისში მყოფი ორსულები იყვნენ.

ქვეპროგრამის ფარგებში, თუ ქალბატონი, შესაბამისი დოკუმენტების წარმოდგენით დაადასტურებდა, რომ ახალი სიცოცხლის მოლოდინში იყო, აუცილებლად ხდებოდა პროგრამის მოსარგებლე. ის იღებდა მატერიალურ დახმარებას შემდეგი მომსახურებით: ექიმთან დამატებითი ვიზიტი, ლაბორატორიული კვლევა და საჭირო მედიკამენტები.

პროექტის ბენეფიტი 60-მა ორსულმა მიიღო. დახმარება კი სამ სექტორს ითვალისწინებდა:
ექიმის ვიზიტი (8 უფასო ვიზიტს ზემოთ),
ლაბორატორიული კვლევა;
მედიკამენტები/ ინექციები (ექიმის რეკომენდაციით).

აღნიშნული პროექტის შესახებ უფრო ვრცლად FirstNews.ge-ს ოჯახის ბუნებრივი დაგეგმვის ექსპერტი ნანა ნებიერიძე ესაუბრა:

"პროექტი არ ითვალისწინებდა მხოლოდ სოციალურად დაუცველობის სტატუსის მქონე ორსულების დახმარებას. ის მოიცავდა ყველა ორსულს, ვისაც მკურნალობის საჭიროება აქვს. რაც განსაკუთრებულად დიდ ხარჯებთან არის დაკავშირებული.

პროექტის ეს ეტაპი დასრულდა და ვიმედოვნებთ, რომ იქნება მეორე ეტაპი, რომელიც შეეხება განსაკუთრებული რისკის ქვეშ მყოფ ორსულებს და დაუფინანსებს ძვირადღირებული მედიკამენტების შეძენას, რადგან პირველმა გამოცდილებამ გვაჩვენა, რომ ამის საჭიროება გამოიკვეთა.

ეს ჩვენც მოგვცემს საშუალებას, როგორც სიცოცხლის სამსახურს, ჩვენი მცირედი წვლილი შევიტანოთ ჯერ არშობილი ბავშვის სიცოცხლის გადარჩენაში," - განაცხადა ნანა ნებიერიძემ.

პროექტის მნიშვნელობაზე, ასევე, გვესაუბრა მისი ერთ-ერთი მონაწილე:

"ორგანიზაცია INER Georgia ძალიან მნიშვნელოვან საქმეს აკეთებს ორსულებისა და მშობლებისთვის. ორსულობის პერიოდში ქალს ძალიან ბევრი გამოკვლევა, ანალიზი და მედიკამენტი სჭირდება, ის 8 გეგმური ვიზიტი კი, რომელიც სახელმწიფოს აქვს გათვლილი და დაფინანსებული, არ არის საკმარისი რომ ყველა საჭიროება მოიცვას. მე პირადად ორსულობისას არაგეგმური ექოსკოპია, კვლევა და ექიმთან ვიზიტი დამჭირდა, რაც ფინანსურად იმ დროს ჩემთვის არ იყო ხელმისაწვდომი. სწორედ INER Georgia იყო ის ორგანიზაცია, რომელიც ამ რთულ დროს გვერდით დამიდგა, დღეს კი 10 თვის ალექსანდრეს დედა ვარ. ასევე, მნიშვნელოვანია ის ლექციები, რომელსაც ორგანიზაცია მშობლის სკოლაში ატარებს და ცნობიერების ამაღლებას უწყობს ხელს. ვფიქრობ, ყველა მშობელმა უნდა გაიაროს ეს სკოლა," - აღნიშნა თათია ახვლედიანმა.

ი

პროექტი განხორციელდა როგორც ადგილობრივი, ასევე რეგიონული მასშტაბით: წყალტუბო, ზესტაფონი, ახალციხე, ფოთი, თბილისი.
აქტიური თანამშრომლობა შედგა:
„ბომონდის“ კლინიკა
ხონელიძის სახ. კლინიკა
„სიცოცხლის ხე“
დასავლეთ საქართველოს ინტერვენციული ცენტრი და ა.შ.
პროვაიდერი აფთიაქი შპს „იმპექსი.

შეგახსენებთ, რომ “INER Georgia – წყვილისა და სიცოცხლის სამსახურში” 2002 წელს დაარსდა ქალაქ ქუთაისის, მცირე პროფესიონალი ჯგუფის მიერ.

ორგანიზაციის საქმიანობა მოიცავს ოჯახების მხარდაჭერას აღმზრდელობით - საგანმანათლებლო, სოციალურ - სანიტარული და საკონსულტაციო პროფილით. ოჯახის ყველა სეგმენტისთვის გათვალისწინებულია შესაბამისი მომსახურება.