ვერსიები

სომხეთის თავდაცვის სამინისტროს ვერსია ასეთია: „აზერბაიჯანის სამხედრო ნაწილებმა ცეცხლი გაუხსნეს სომხეთის სამხედროებს, რომლებიც საინჟინრო სამუშაოებს აწარმოებდნენ სოფელ თეღის მიმართულებით. სომეხმა სამხედროებმა საპასუხო ზომები მიიღეს“.

მომდევნო განცხადებაში სომხეთის თავდაცვის უწყება წერს, რომ ადგილობრივი დროით 17:30 საათისთვის აზერბაიჯანის შეიარაღებული ძალების დანაყოფებმა იმავე მიმართულებით გამოიყენეს ნაღმმტყორცნები.

„სომხეთის შეიარაღებული ძალების ქვედანაყოფებმა მიიღეს აუცილებელი თავდაცვითი ზომები“, - წერს სომხეთის თავდაცვის სამინისტრო.

მეორე მხრივ, აზერბაიჯანი აცხადებს, რომ დაპირისპირება „სომხეთის პროვოკაციის შედეგად“ დაიწყო.

„ამჟამად, სომხური მხარე ბომბავს ჩვენს პოზიციებს ნაღმმტყორცნებისა და მძიმე შეიარაღების გამოყენებით. მიმდინარეობს საჭირო ზომების გატარება“, - აცხადებს აზერბაიჯანის თავდაცვის სამინისტრო.

აზერბაიჯანის საგარეო უწყების პოზიციით, „სომხეთი სერიოზულ საფრთხეს უქმნის რეგიონულ მშვიდობასა და უსაფრთხოებას“; მისი განცხადებით, „აზერბაიჯანის რესპუბლიკის შეიარაღებული ძალები იღებენ ყველა საჭირო ზომას და გააგრძელებენ ამ ზომების მიღებას“.

ბოლო პერიოდია, სომხეთსა და აზერბაიჯანს შორის იმატებს დაძაბულობა.

გადაუმოწმებელი ცნობები მედიაში

აზერბაიჯანულ მედიაში ვრცელდება ცნობები სომხეთის მხრიდან ირანული წარმოების დრონების გამოყენების შესახებ, თუმცა ჯერჯერობით ამის დამადასტურებელი ვიდეო- ან ფოტომასალა არ გამოქვეყნებულა.

სომხეთის თავდაცვის სამინისტრომ ეს ინფორმაცია უარყო და სიყალბე უწოდა.

სოფელ თეღთან შეტაკებები მოხდა 2021 წლის მოვლენების დროსაც.