"მოგვწონს თუ არ მოგვწონს უკრაინის ომის გამო საქართველოს შემოსავლები მნიშვნელოვნად გაიზარდა"
ომებს და მასთან დაკავშირებულ სანქციებს (ემბარგოებს) მეომარი მხარეებისათვის ზარალი მოაქვს, ზოგიერთებისათვის კი მოგებაც, - ამის შესახებ სოციალურ ქსელში პოლიტიკური მიმომხილველი სიმონ კილაძე წერს.
მისი თქმით, პირველ და მეორე მსოფლიო ომებში ძირითადად ევროპელები და აზიელები დაზარალდნენ, ამერიკელები კი, როგორც ამბობენ, გამდიდრდნენ (იარაღის მიწოდებით, სამხედრო-სამრეწველო პოტენციალის გაზრდით და ა.შ.).
"სპარსეთის ყურის ომების დროს (ირან-ერაყი, ერაყ-ქუვეითი), როცა მეომარ და იმავდროულად, ენერგორესურსებით მდიდარ ქვეყნებში ნავთობის მოპოვება შემცირდა, მოგება მიიღეს საუდიტებმა და სხვა მეზობელმა ქვეყნებმა, რომლებმაც ნავთობის მოპოვება გააფართოვეს.
წარსულის ბევრი სხვა მაგალითის გახსენება შეიძლება, მაგრამ აწმყოში გადმოვინაცვლოთ.
რუსეთ-უკრაინის ომმა სრულიად შეცვალა გეოეკონომკური ვითარება და სატრანზიტო პოლიტიკა. თუ ადრე აზიიდან ევროპისაკენ და პირიქით სატრანზიტო მარშრუტები ძირითადად რუსეთის ტერიტორიაზე გადიოდა, ახლა, როცა რუსეთს სანქციები აქვს დაწესებული, გარდაუვალი გახდა ახალი მარშრუტების ძიება აზიური და ევროპული ტვირთებისათვის. ერთ-ერთი სატრანზიტო მარშრუტი საქართველოზეც გადის.
მოგვწონს თუ არ მოგვწონს (ზნეობრივ-მორალური თვალსაზრისით), უკრაინის ომის გამო საქართველოს შემოსავლები მნიშვნელოვნად გაიზარდა - "ტრასეკას" დერეფანი თითქმის სრული სიმძლავრით ამოქმედდა. ნახტომისებურად გაიზარდა ტვირთების გადაზიდვა საავტომობილო ტრანსპორტით (პლუს მთავრობამ სატრანზიტო ტარიფებიც მოამატა).
რაც შეეხება "საქართველოს რკინიგზას", მისმა შემოსავლებმა, იანვარ-ივნისის მონაცემებით, ბოლო წლებში ისტორიული რეკორდი დაამყარა - 191 მილიონი ლარის ოდენობით. სავარაუდოდ, 2022 წლის ბოლომდე შემოსავლები კიდევ უფრო გაიზრდება.
ასეა და რას ვიზამთ.... ომით ზოგი ზარალდება, ზოგიც, ეკონომიკური კანონზომიერების მიხედვით, გარკვეულ მოგებას იღებს.
თუმცა ჩვენთან ფასები მაინც იზრდება, ცხოვრება გაძვირებას აგრძელებს..."- წერს სიმონ კილაძე.
სიახლეები
- "ქუთაისს ქვეყნის საგანამანათლებლო ცენტრის სტატუსი ოდითგანვე აქვს და მისი განვითარება უნდა მოხდეს" - დავით ერემეიშვილი
- "რატომ მაინც და მაინც 4 ოქტომბერი აქციის დღე? ყოფილიყო 5 ან 6 ოქტომბერი, მაგრამ ეს დღე შეგნებულად ჩაუსვეს იმ ოპოზიციას, ვინც არჩევნებში მონაწილეობს" - პაატა ზაქარეიშვილი
- "ეუთოს დამკვირვებლების მოპატიჟება ნიშნავს იმას, რომ "ოცნება" ბევრად უფრო სტრატეგიულად აზროვნებს"- კახა გოგოლაშვილი
- "საქართველოს მოქალაქეებს მოვუწოდებთ, 4 ოქტომბერს რუსული რეჟიმი მშვიდობიანად დავამხოთ და ამისთვის უნდა მოვემზადოთ" - ანა წითლიძე
- "მსოფლიოს შეუძლია აიძულოს კრემლის დამნაშავეები, შეწყვიტონ მკვლელობები" - ვოლოდიმირ ზელენსკი