„გრძელდება იზიუმთან მასობრივი სამარხის ადგილზე ცხედრების ექსჰუმაცია. ამჟამინდელი მონაცემებით, დადგენილია 440-ზე მეტი საფლავი. იქ დამარხული ადამიანების რაოდენობაზე ჯერ ადრეა საუბარი, საგამოძიებო მოქმედებები გრძელდება. არის ადამიანების წამების, მათი შეურაცხყოფის მკაფიო მტკიცებულებები… მეტიც, არის მტკიცებულებები, რომ რუსი სამხედროები, რომელთა პოზიციები აღნიშნული ადგილის სიახლოვეს იყო, მოკლულებს გასართობად ესროდნენ. მსოფლიომ ამ ყველაფერზე რეაგირება უნდა იქონიოს. რუსეთმა გაიმეორა იზიუმში ის, რაც ჩაიდინა ბუჩაში. ჩვენ ჯერ მხოლოდ დავიწყეთ სრული სიმართლის გაგება იმის შესახებ, რაც ხდებოდა ხარკოვის ოლქში“, – განაცხადა ზელენსკიმ.

უკრაინის პრეზიდენტის თქმით, გაერო უკვე ამზადებს ჯგუფს, რომელიც ჩავა იზიუმში და შეისწავლის იქ არსებულ სიტუაციას. ზელენსკი აცხადებს, რომ მედიისთვის გათავისუფლებულ ტერიტორიაზე სრული წვდომა იქნება უზრუნველყოფილი.

მან ევროპის ქვეყნებს რუსეთის მოქალაქეებისთვის ვიზების გაცემის სრულად შეწყვეტისკენ მოუწოდა. ასევე საერთაშორისო კომპანიებს მოუწოდა, უარი თქვან რუსეთში მუშაობაზე.

„თუ რომელიმე სახელმწიფო ირჩევს ტერორის გზას, ყველა ღირსეული კომპანიის ვალდებულებაა, გაემიჯნოს ასეთ სახელმწიფოს“, – განაცხადა ზელენსკიმ.