გთავაზობთ პუბლიკაციას:

აშშ-ის ცენტრალური სადაზვერვო სააგენტო (CIA – ცსს) ყველა თავის თანამშრომელს ფულად კომპანსაციას სთავაზობს, თუ ისინი მზადყოფნას გამოხატავენ სამსახურიდან წასასვლელად, შტატების შემცირების გამო“, - იტყობინებიან წყაროები ამერიკულ პრესაში.

სადაზვერვო უწყებამ ასევე შეაჩერა ახალი თანამშრომლების მიღება - მათი ჩათვლითაც, რომლებსაც უკვე ჰქონდა შეთავაზება და უკვე შესაბამის შემოწმებას გადიოდნენ, - წერს გაზეთი „უოლ სთრით ჯორნელი“ (The Wall Street Journal) სტატიაში სათაურით „ცსს თავის ყველა თანამშრომელს გამოსასყიდს სთავაზობს, დონალდ ტრამპის რეორგანიზაციის ჩარჩოებში“ (ავტორები - ჯოელ შეკმანი და დასტინ ფოლცი).

„შეთავაზებების დიდი ნაწილი, როგორც ჩანს, უკან იქნება გაწვეული და გაუქმდება - იმ შემთხვევაში, თუ მათი ბიოგრაფიები [და პოზიციები] შეუსაბამო იქნება აშშ-ის პრეზიდენტის დონალდ ტრამპის ახალ მიზნებთან“, - ამბობს გაზეთის ჟურნალისტებთან საუბარში CIA-ს ახალი დირექტორის ჯონ რეტკლიფის თანაშემწე, რომელმაც ანონიმად დარჩენა ისურვა.

როგორც სააგენტო „როიტერს“ (Reuters) განუცხადა სადაზვერვო უწყების ერთ-ერთმა თანამშრომელმა ქალმა, ასეთი გადაწყვეტილება „საერთო სტრატეგიის ელემენტს წარმოადგენს, რომელიც უწყებაში „ახალი სისხლის“ გადასხმას გულისხმობს“.

ცენტრალური სადაზვერვო სააგენტოს საქმიანობის უდიდესი ნაწილი საიდუმლოებით არის მოცული. უწყების კონკრეტულ ოპერაციებზე რომ არაფერი ვთქვათ, საიდუმლოა მისი ბიუჯეტი და თანამშრომელთა რაოდენობაც.

„კონტრდაზვერვის კატასტროფა“

მიმდინარე შემცირებების კამპანიის ჩარჩოებში CIA-მ თეთრ სახლში დაუშიფრავი წერილი გაგზავნა ელფოსტით ყველა იმ თანამშრომლის სიებით, რომლებიც სამსახურში ბოლო ორი წლის განმავლობაში იქნენ მიღებულნი“, - წერს გაზეთი „ნიუ-იორკ თაიმსი“ (The New York Times) სტატიაში „თეთრმა სახლმა CIA-ს თანამშრომლების სია მოსთხოვა, პრეზიდენტის ბრძანებულების თანახმად, ფედერალური მოსამსახურეების საშტატო ერთეულების შემცირების მიზნით“ (ავტორები - დევიდ სენგერი და ჯულიან ბარნსი).

ასეთ თანამშრომლებს ჯერ კიდევ არ დამთავრებიათ გამოსაცდელი ვადა, ამიტომ მათი სამსახურიდან გაშვება ყველაზე იოლია. CIA-ს აგენტებისა და ანალიტიკოსების გამოსაცდელი ვადის ხანგრძლივობა ოთხი წელია, ამიტომაც თეთრმა სახლმა სწორედ მათი სია მოითხოვა, ვისაც ორი წელი და უფრო ნაკლები აქვს ნამსახურები.

სიაში ნაჩვენებია თანამშრომელთა სახელები და მათი გვარების პირველი ასოები, რომელთა შორის, „ნიუ-იორკ თაიმსის“ ცნობით, ბევრი ახალგაზრდა ანალიტიკოსი და ოპერატიული მუშაკია, რომლებიც ჩინეთზე არიან დასპეციალებულნი. მათი ვინაობა დღემდე მკაცრად საიდუმლოდ ითვლებოდა, რადგან ჩინელი ჰაკერები, პეკინის დაკვეთით, მათ იდენტიფიცირებას ცდილობდნენ. ახლა კი აგენტთა მონაცემები ნაწილობრივ უკვე ცნობილი გახდა.

CIA-ს რიგი ყოფილი თანამშრომლებისა და ჩინოვნიკების თქმით, თანამშრომელთა სიის გადაგზავნა ჩვეულებრივი ელექტრონული ფოსტის მეშვეობით, ანუ სრულიად დაუცველი კავშირის საშუალებით სახელთა გაჟონვა წარმოადგენს და, შესაბამისად, დიდი ალბათობით, მოწინააღმდეგისათვის საჩუქარი იქნება.

ზოგიერთი ყოფილი ჩინოვნიკის განცხადებით, ისინი შეშფოთებულნი არიან იმითაც, რომ აგენტების სია შეიძლება გადაეცეს ილონ მასკის დეპარტამენტში ახლახან დაქირავებულ ახალგაზრდა პროგრამისტებს, რომლებიც ბიუროკრატული აპარატის შემცირებით არიან დაკავებულები. თუ ეს მართლაც ასე მოხდება, მაშინ CIA-ს თანამშრომლების სახელები (თუნდაც გვარის ინიციალებით) ჩინეთისა და სხვა ქვეყნების დაზვერვისათვის იოლი ლუკმა გახდება.

ცენტრალური სადაზვერვო სააგენტოს ერთ-ერთმა ყოფილმა ოფიცერმა მომხდარ ფაქტს „კონტრდაზვერვის კატასტროფა“ უწოდა, - წერს „ნიუ-იორკ თაიმსი“.

სპეციალისტების თქმით, სრული სახელი და გვარის პირველი ასო საკმარისია იმისათვის, რომ საკმაოდ ვრცელი ინფორმაცია იქნას მოპოვებული უცხო დაზვერვისათვის საინტერესო ადამიანზე, სხვა მონაცემების შეთავსებით, მაგალითად, მძღოლის მოწმობის, ავტომანქანის ნომერის, სოციალური ქსელების სააღრიცხვო ჩანაწერების და უნივერსიტეტების მიერ გაცემული დიპლომების მეშვეობითაც კი, სადაც CIA პერსპექტიულ კურსდამთავრებულებს არჩევს.

აშშ-ის დაზვერვის პრიორიტეტი: ჩინეთი

როგორც ამერიკული პრესა იტყობინება, 2024 წელს ცენტრალურმა სადაზვერვო სააგენტომ ყველაზე წარმატებული სარეკრუტო კამპანია (ახალი თანამშრომლების მიღების თვალსაზრისით) განახორციელა 11 სექტემბრის ტერაქტების შემდეგ.

CIA-ს ყოფილი დირექტორის უილიამ ბერნსის ხელმძღვანელობით, სააგენტომ სამსახურში მიიღო სხვადასხვა უნარ-ჩვევების მაღალი დონით გამორჩეული, ენებისა და ხალხთა კულტურის სპეფიფიკის ღრმად მცოდნე ბევრი თანამშრომელი. ეს ყველაფერი, სააგენტოს წინა ხელმძღვანელების თქმით, აუცილებელი იყო ოპერაგენტების საზღვარგარეთ დავალებების შესასრულებლად.

დღემდე ცენტრალური სადაზვერვო სააგენტო განსაკუთრებულ ყურადღებას უთმობდა იმ განყოფილების გაფართოებას და დაკომპლექტებას მაღალი დონის სპეციალისტებით, რომელიც ჩინეთით არის დაკავებული.

2021 წელს, როცა ცსს-ს დირექტორი უილიამ ბერნსი გახდა, სადაზვერვო უწყება ჩინეთთან დაკავშირებულ პროექტებზე თავისი ბიუჯეტის მხოლოდ 9%-ს ხარჯავდა, ამჟამად კი ჩინეთის წილი უკვე 20%-მდეა გაზრდილი.

პერსონალის შემცირებას შეუძლია მნიშვნელოვანი გავლენა მოახდინოს სპეცსამსახურის მუშაობის ეფექტურობაზე ჩინეთის მიმართულებით.

თუმცა როგორც CIA-ს ახალი დირექტორი ჯონ რეტკლიფი აცხადებს, რომელიც თანამდებობაზე დონალდ ტრამპის მიერ არის დანიშნული, ჩინეთის მიმართულება მისთვისაც პრიორიტეტულია და იგი შეეცდება პროფილური უნარ-ჩვევების მქონე სპეციალისტები შეინარჩუნოს.

დონალდ ტრამპის იდეის რეალიზება

დონალდ ტრამპი ჯერ კიდევ წინასაარჩევნო კამპანიის დროს აცხადებდა, რომ აშშ-ის მთავრობის მუშაობის ეფექტურობის ამაღლება აუცილებელია და იგი ამას აუცილებლად განახორციელებს, როცა პრეზიდენტი გახდება.

მრავალი ფედერალური უწყების თანამშრომლებმა იანვრის ბოლო კვირაში წინადადებები მიიღეს გათავისუფლებულიყვნენ სამსახურიდან ისე, რომ ხელფასს 30 სექტემბრის ჩათვლით მაინც მიიღებდნენ. როგორც გაზეთ „უოლ სთრით ჯორნელის“ ჟურნალისტები წერენ, მათ თითქმის 100-მდე ჩინოვნიკი გამოკითხეს და გაირკვა, რომ ასეთ შეთავაზებას მათში მაინცდამიანც დიდი ინტერესი არ გამოუწვევია.

როგორც „ნიუ-იორკ თაიმსი“ აღნიშნავს, ეროვნულ უსაფრთხოებასთან დაკავშირებული სპეცუწყებების თანამშრომელთა გათავისუფლების პირობები იგივენაირია, როგორიც არასაიდუმლო უწყებებში, თუმცა ჯერ-ჯერობით გაურკვეველია, მსგავსი პირობები იქნება თუ არა შეთავაზებული სხვა სადაზვერვო სტრუქტურების მიმართაც, რომელთა რაოდენობა ათზე მეტია.

აშშ-ის ტელეარხ „სიენენის“ (CNN) ცნობით, მიუხედავად იმისა, რომ შეთავაზება CIA-ს ყველა თანამშრომელს დაეგზავნა, შესაძლოა შემცირება ყველას არ შეეხოს. ერთ-ერთი წყაროს ვარაუდით, იმ აგენტებზე, რომლებიც ძალიან სპეციალიზებული ცოდნით გამოირჩევიან, ნებაყოფლობითი გათავისუფლების პრინციპი არ გავრცელდება.

მოამზადა სიმონ კილაძემ

წყარო