დაწოლილ მდგომარეობაში ჭამის ჩვევა ბევრის უვნებლად მიაჩნია, მაგრამ მას შეიძლება საშიში შედეგები მოჰყვეს ჯანმრთელობისთვის და სიცოცხლისთვისაც კი.

დაწოლილ მდგომარეობაში ჭამა არღვევს საჭმლის მონელების ბუნებრივ პროცესებს. საჭმლის მომნელებელი სისტემა სწორად მხოლოდ მაშინ ფუნქციონირებს, როდესაც ვერტიკალურ მდგომარეობაში ხართ ან სწორი ზურგით ზიხართ. ამ პირობებში, გრავიტაციის ძალის გავლენით, საკვები შეუფერხებლად გადადის საყლაპავში და შემდეგ კუჭში. წოლა აფერხებს ამ ბუნებრივ პროცესს. საკვებმა უნდა გადალახოს გრავიტაცია, რამაც შეიძლება შეანელოს მისი მოძრაობა. კუჭი კუნთოვანი ორგანოა და წოლის დროს ის არასწორ მდგომარეობაშია. ეს ხელს უშლის მის ნორმალურ შეკუმშვას (პერისტალტიკას), რომელიც აუცილებელია საკვების კუჭის წვენთან კარგად შესარევად. შედეგად, საკვები შეიძლება კუჭში უფრო დიდხანს დარჩეს, რაც იწვევს სიმძიმის შეგრძნებას, შებერილობას და დისკომფორტს.

განსაკუთრებულ საფრთხეს წარმოადგენს ასპირაცია. წოლის დროს ტრაქეის შესასვლელი საყლაპავის დონეზეა, რაც მნიშვნელოვნად ზრდის საკვების ნაჭრის ან სითხის წვეთის არასწორი მიმართულებით ჩასვლის რისკს. უარეს შემთხვევაში, ამან შეიძლება გამოიწვიოს ასპირაცია - უცხო სხეულების ფილტვებში მოხვედრა, რამაც შეიძლება გამოიწვიოს მძიმე პნევმონია.

გარდა ამისა, სავსე კუჭით წოლა ზრდის რეფლუქსის და გულძმარვის რისკს. თუ ეს რეგულარულად ხდება, საყლაპავის ლორწოვანი გარსი ღიზიანდება, ზიანდება, რამაც შეიძლება სერიოზული დაავადებების განვითარება გამოიწვიოს.

მნიშვნელოვან ყარყოფით შედეგს წარმოადგენს საკვები ნივთიერებების არასრული შეწოვა, რამაც შეიძლება ორგანიზმში ვიტამინების, მინერალების და სხვა სასარგებლო ნივთიერებების ნაკლებობა გამოიწვიოს. შეიძლება დაირღვეს სხეულის ტანდეგობა, თუ ადამიანი იდაყვს ეყრდნობა ან სხვა არაბუნებრივ პოზაშია.

გარდა ამისა, გასათვალისწინებელია ფსიქოლოგიური ასპექტი: დაწოლილ მდგომარეობაში კვება ხშირად დაავადებასთან ასოცირდება, განსაკუთრებით მაშინ, როდესაც ადამიანი დასუსტებულია. საწოლში რეგულარულმა კვებამ შეიძლება არაცნობიერად იმოქმედოს იმაზე, თუ როგორ აღვიქვამთ კვების პროცესს, რაც მას მნიშვნელოვან სოციალურ და კულტურულ კომპონენტს ართმევს. ორგანიზმი არ არის „შეგუებული“ საკვების ამგვარ მიღებასთან, რამაც ასევე შეიძლება უარყოფითად იმოქმედოს საჭმლის მონელებაზე.

დაწოლილ მდგომარეობაში კვება განსაკუთრებით საშიშია კუჭ-ნაწლავის დაავადებების მქონე ადამიანებისთვის, მათ შორის გასტრიტის, გასტროეზოფაგური რეფლუქსური დაავადების და დიაფრაგმის თიაქრის მქონე ადამიანებისთვის, ასევე ხანდაზმულებისა და მცირეწლოვანი ბავშვებისთვის, რომელთა ყლაპვისა და სუნთქვის დაცვის მექანიზმები ჯერ კიდევ არ არის ჩამოყალიბებული ან შესაძლოა დასუსტებული იყოს.