მისი თქმით, ძალიან დიდი მნიშვნელობის დღეა რამდენიმე მიზეზის გამო.

“მოგეხსენებათ სულ ახლახანს ჩვენ გავხსენით პარტია „საქართველოსთვის“ მესტიაში ოფისი, რაც ჩვენთვის დიდი პატივია და ამავე დროს სულ რამდენიმე დღეში ვიწყებთ საარჩევნო კამპანიას, რომელშიც ყველაზე ღირსეული სვანეთის შვილები იქნებიან წარმოდგენილი ჩვენი პარტიის სახელით და მე პატივი მაქვს თითოეული თქვენგანი დღეს გავაცნო საზოგადოებას. გარდა ამისა, მინდა გითხრათ, რომ ჩვენ ბევრჯერ ვთქვით, რომ ვერთიანდებით საქართველოსთვის, მაგრამ არავის წინააღმდეგ და ეს პრინციპული სიტყვებია. პრინციპული სიტყვებია იმიტომ, რომ ჩვენ ვინმეს წინააღმდეგ ბრძოლა არასოდეს არ უნდა გავხადოთ თვითმიზანი. ჩვენ ყველამ უნდა ვიბრძოლოთ საქართველოსთვის, საქართველოს წინსვლისთვის და თითოეულ რეგიონში, სვანეთში, მესტიაში ყველაფერი უნდა გავაკეთოთ იმისთვის, რომ შევქმნათ უკეთესი მომავალი ქვეყნისთვის, ჩვენი შვილებისთვის და ჩვენი მუნიციპალიტეტებისთვის. ამ შემართებით დარწმუნებული ვარ თითოეული თქვენგანი ჩაერთვება ამ საარჩევნო კამპანიაში და იბრძოლებს გამარჯვებისთვის. კამპანიაში, რომელიც არის უაღრესად მნიშვნელოვანი, რამეთუ ყველას უნდა გვესმოდეს, რომ ეს არ არის მხოლოდ მუნიციპალური არჩევნები. ეს არჩევნები დიდი ხანია გასცდა უკვე მუნიციპალურ დონეს. ეს არის არჩევნები, რომლისგანაც დაიწყება ცვლილებები ჩვენს ქვეყანაში და დაიწყება რეალური წინსვლა. ჩვენ ყველას კარგად გვახსოვს ის, რომ ბოლო წლების განმავლობაში სერიოზული ცვლილებები იყო ქვეყანაში, თუმცა დღეს, ჩვენ ერთ ადგილზე ვდგავართ სამწუხაროდ. შეიძლება ითქვას, რომ ბევრი მიმართულებით უკანაც ვიხევთ და ჩვენ ეს ყველაფერი უნდა დავასრულოთ. რა თქმა უნდა, ყველაფერი კარგი, რაც ბოლო წლების განმავლობაში მოხდა, უნდა შევინარჩუნოთ და ამ ყველაფერზე დავაშენოთ ახალი წარმატებების ისტორია", - განაცხადა გიორგი გახარიამ.