„ოცნებასთან“ ქვეყნის შიგნით ვკამათობთ და ქვეყნის გარეთ, სახელმწიფო უნდა წარმოვადგინოთ ერთად, ეს არის სახელმწიფოებრივი ცხოვრების ანა-ბანა'',- ამის შესახებ პარტია „ლელო - საქართველოსთვის“ ერთ-ერთმა ლიდერმა, დავით უსუფაშვილმა საპარლამენტო დელეგაციის უკრაინაში გამგზავრებასთან დაკავშირებით საუბრისას განაცხადა.

დავით უსუფაშვილის ინფორმაციით, სავარაუდოდ, დღეს მიიღებენ გადაწყვეტილებას თუ ვინ იქნება წარმოდგენილი დელეგაციაში „ლელოდან“. მისივე თქმით, პარლამენტის თავმჯდომარე შალვა პაპუაშვილს თავიდან არასწორი პოზიცია ჰქონდა, როდესაც უკრაინაში გამგზავრების თემა მოუგვარებელ საკითხებს დაუკავშირა, თუმცა მისი დღევანდელი პოზიცია სწორია.

"უკრაინაში რუსული აგრესიის დაწყების პირველი დღიდან „ლელო“ რჩება მომხრე იმისა, რომ საქართველო ერთიანი და მობილიზებული შეხვდეს იმ საფრთხეს, რომელიც ჩვენც გვემუქრება. უკრაინაში მიმდინარე ომი საქართველოს მომავლისთვის უმნიშვნელოვანესი საკითხია. ჩვენ პირველივე დღიდან მივმართეთ პარლამენტის თავმჯდომარეს, რომ რიგგარეშე სხდომა ჩაგვეტარებინა და ერთიანი პოზიცია დაგვეფიქსირებინა, ჩვენ დღესაც ვრჩებით ამ პოზიციაზე, ამიტომ ყველა ვიზიტში თუ ურთიერთობაში „ლელო“ აქტიურად იქნება ჩართული. ჩვენ გადაწყვეტილებებს მივიღებთ პროცესის მიმდინარეობის კვალობაზე, ამიტომ სავარაუდოდ, დღეს ჩამოვყალიბდებით თუ ვინ იქნება დელეგაციაში „ლელოდან“. ერთი კვირის წინ საქართველოს პარლამენტის თავმჯდომარეს ჰქონდა არასწორი პოზიცია, როდესაც უკრაინაში გამგზავრების თემა დაუკავშირა მოუგვარებელ საკითხებს, რომელიც ჩვენი უნიათობით იყო შექმნილი. დღეს მისი პოზიცია არის სწორი, როდესაც ამბობს, რომ მიემგზავრება უკრაინაში და ჰქონდა ურთიერთობა რადას თავმჯდომარესთან“, - აღნიშნა დავით უსუფაშვილმა.