"იმ ადამიანის ქორწილის ჩაშლა, რომელსაც არც დანაშაული აქვს ჩადენილი რაიმეში და არც არაფერი, საქართველოში არის უბრალოდ ჩვენს კულტურასთან შეუთავსებელი მოვლენა. თავის დროზე, "სტუმარ-მასპინძელი" ვაჟა-ფშაველამ დაწერა მე-19 საუკუნეში. მაშინ, ზოგადად, მსოფლიოში შედარებით ნაკლებად ცივილიზებული იყო საზოგადოება, მათ შორის ეხებოდა ეს საქართველოსაც, ბევრად მეტი სალომე ზურაბიშვილი და ელენე ხოშტარია ცხოვრობდა საქართველოში. ასეთი ბნელებისთვის დაწერა მე-19 საუკუნეში ვაჟა-ფშაველამ "სტუმარ მასპინძელი", - თქვა კობახიძემ.

მან, ასევე უპასუხა პრეზიდენტის იმ განცხადებას, რომ იგი "არ დაუშვებს ბატონი კობახიძე თავს ნებას აძლევდეს, ქართველი ხალხის ქსენოფობიაზე დაიწყოს საუბარი".

"ვინ ეკითხება სალომე ზურაბიშვილს მე რაზე ვისაუბრებ? მან თავის უფლებამოსილებებს მიხედოს, ჯობია", - ამბობს "ქართული ოცნების" თავმჯდომარე.

მისივე სიტყვებით, პრეზიდენტს უფლება არ აქვს, ისაუბროს ქართველი ხალხის სახელით, როცა ამბობს, რომ "ქორწილის ჩაშლა ქართველი ხალხის გამარჯვებაა".

"საქართველოში ხალხმა პოლიტიკის განსაზღვრის ლეგიტიმაცია მიანიჭა ქართული ოცნების ხელისუფლებას, პარლამენტს, მთავრობას. ეს არის რეალობა. პრეზიდენტს უფლება არ აქვს, ხალხის სახელით ისაუბროს, ის მთლიანად აცდენილია იმ ხალხის ნებას, რომელმაც მას დაუჭირა ხმარი 2018 წელს.

როდესაც პრეზიდენტი აქეზებს ქსენოფობიურ კამპანიას, როდესაც ქორწილის მეორე დღის ჩაშლას აფასებს ის ხალხის გამარჯვებად, ეს უბრალოდ, სამარცხვინოა", - თქვა მან.

რუსეთის საგარეო საქმეთა მინისტრის, სერგეი ლავროვის სანქცირებული შვილისა და სიძის საქართველოში შემოშვებაზე კომენტარისას ირაკლი კობახიძემ განაცხადა, რომ ოჯახის წევრების სანქცირება ადამიანის უფლებების სტანდარტებს ეწინააღმდეგება.

"თეორიულადაც რომ განვიხილოთ ვინმეს პერსონალური სანქცირება, ეს შეიძლება, შეეხებოდეს მხოლოდ იმ ადამიანებს, რომელბსაც გარკვეული დანაშაული აქვთ ჩადენილი. არ შეიძლება, სანქციები ეხებოდეს, ზოგადად, ოჯახის წევრს. ეს მიდგომა ეწინააღმდეგება ადამიანის უფლებების სტანდარტებს. მე ვარ ადამიანის უფლებების სპეციალისტი, გერმანიაში მაქვს ნასწავლი ეს სფერო", - ამბობს ირაკლი კობახიძე.