ხვიჩიას თქმით, “ენჯეო” სექტორი პროცესის გაგრძელების თვალსაზრისით ალბათ ფიქრობს, რომ ეს მომგებიანი ჟესტია, თუმცა არ სჯერა, რომ ამას საკონსტიტუციო სასამართლო განიხილავს.

“მე ცოტა მიკვირს, რომ საკონსტიტუციო სასამართლოს რწმენა აქვთ შერჩენილი [არასამთავრობო ორგანიზაციებს]. ზოგადად, ამ კანონის მოქმედებას რომ არ ემორჩილებიან, ეს მესიჯი მომწონს და მგონია, რომ სწორია ამ თვალსაზრისით ხელისუფლების ასეთი დარტყმის ქვეშ დაყენება.

რაც შეეხება საკონსტიტუციო სარჩელს, არ ვიცი შეიძლება ჰქონდეს თუ არა ის მნიშვნელობა, რომ ამ მიმართულებით რაიმე შეცვალოს, მაგრამ პროცესის გაგრძელების თვალსაზრისით, ალბათ, ფიქრობენ, რომ ეს მომგებიანი ჟესტია, თუმცა არ მჯერა, რომ ამას საკონსტიტუციო სასამართლო განიხილავს”, - აღნიშნა იაგო ხვიჩიამ.

ამავე თემაზე საუბრისას იაგო ხვიჩიამ აღნიშნა, რომ არასამთავრობო ორგანიზაციებმა ემოციებს უნდა მოუკლონ და “აზროვნება დაიწყონ”.

როგორც ხვიჩიამ აღნიშნა, არასამთავრობო ორგანიზაციებმა თანამოაზრეები უნდა იპოვონ არა მათი გადარჩენის, არამედ ზოგადად ევროინტეგრაციის და პროდასავლური ვექტორის შენარჩუნების საქმეში.

“დღევანდელი პოლიტიკით არასამთავრობო ორგანიზაციები ლანძღვა-გინებით საკუთარ მომხრეებს შლიან მიტინგზე. შესაბამისად, მათი მორევა მარტივია, მაგრამ თეორიულად ყველა ადამიანს აქვს შანსი, რომ აზრზე მოვიდეს და რამე ხეირიანი გააკეთოს. ამ შემთხვევაში, ზოგადად პროდასავლური ვექტორის მხარეს უზარმაზარი საზოგადოებრივი ენერგიაა, უბრალოდ “ენჯეო” სექტორმა მათი გაფანტვის და ქუჩაში სეირნობის ნაცვლად რაიმე ჭკვიანური გადაწყვეტილება უნდა მიიღოს, მათ თავისი ადგილი უნდა იცოდნენ. თუ შენი ადგილი არ იცი, ცუდი რაღაცები გემართება. მაგალითად, როცა მეკარე თავდასხმაში დგას და თავდამსხმელი კარში, კარგი არაფერი ხდება. იგივე ემართება “ენჯეო” სექტორს. სადაც ისინი დგანან, მათი ადგილი იქ არაა, იქ პოლიტიკოსები უნდა იდგნენ. ან ისინი პოლიტიკოსებად უნდა გადაკვალიფიცირდნენ და მაშინ გასაგები იქნება, უბრალოდ ცოტა დროა დარჩენილი და ამას არ ვურჩევდი. დანარჩენ შემთხვევაში სანამ საკუთარ ადგილს ვერ იპოვიან და ხალხსაც და მუხტსაც დააბნევენ, ბრძოლა წარმატებული არ იქნება”, - განაცხადა ხვიჩიამ.

ცნობისთვის, არასამთავრობო ორგანიზაციები „უცხოური გავლენის გამჭვირვალობის შესახებ“ კანონის სადავო მუხლების შეჩერების მოთხოვნით საკონსტიტუციო სასამართლოს მიმართავენ.

როგორც არასამთავრობო სექტორის წარმომადგენლებმა დღეს გამართულ პრესკონფერენციაზე განაცხადეს, პარალელურად ემზადებიან ადამიანის უფლებათა ევროპულ სასამართლოში საჩივრის წარსადგენად.