მთავრობის მეთაურმა უპასუხა კითხვას, გამარჯვების შემთხვევაში, მიიღებს თუ არა აღნიშვნაში მონაწილეობას პარტიის დამფუძნებელი, ბიძინა ივანიშვილი და განაცხადა: „მოდით, ეს ჩვენს სიურპრიზად დავტოვოთ, ჩვენც გვინდა ჩვენი სიურპრიზი“.

„ჩვენ, ჯერჯერობით, ზეიმს არ ვჩქარობთ, მაგრამ დარწმუნებულები ვართ, რომ 20:00 საათზე, აუცილებლად მოგვიწევს ზეიმი. თქვენ იცით, რომ სტანდარტულად ასეთი სახით აღვნიშნავთ ხოლმე არჩევნებში გამარჯვებას. მთელი ქვეყნის მასშტაბით ჩვენ გვყავს მილიონზე მეტი მხარდამჭერი. წინა არჩევნებზე დაფიქსირდა მილიონ 120 000 ამომრჩევლის მხარდაჭერა. აქაც, დაახლოებით, იმავე შედეგს ველოდებით. ეს არის საერთო სურათი, რაც ყველამ ძალიან კარგად იცის.

რაც შეეხება აღნიშვნას, ამას აქვს თავისი სტანდარტული ტრადიცია და ამ ტრადიციას მივყვებით. რაც შეეხება ხალხთან ერთად ჩვენი გამარჯვების აღნიშვნას, ამას გავაკეთებთ შემდეგი 3 და 4 წლის განმავლობაში, როდესაც სწორედ, ხალხთან ერთად, ყველა ერთად აღვნიშნავთ კონკრეტული პროექტების განხორციელებას. ძალიან შთამბეჭდავი პროექტები გვაქვს დაგეგმილი. ჩვენ მთელი ამ დროის განმავლობაში ვიყავით ერთადერთი პარტია, რომელიც იყო ხალხთან ურთიერთობაში. [ოპოზიციას] კამპანიებიც კი არ ჩაუტარებიათ. ქუთაისში ერთადერთი კანდიდატი ჰყავდა რადიკალურ ოპოზიციას, ქუთაისშიც კი არ ჩასულა. წარმოიდგინეთ, ჩვენ მთელი ამ დროის განმავლობაში, როდესაც იყო წინასაარჩევნო პერიოდი, მუდმივი ურთიერთობა გვქონდა ხალხთან. არა მარტო წინასაარჩევნო პერიოდში. ეს არის ჩვენი დამოკიდებულება ხალხთან - მუდმივი ურთიერთობა ხალხთან, საზოგადოებასთან, როგორც წინასაარჩევნო პერიოდში, ისე არჩევნების შემდგომაც“, - განაცხადა კობახიძემ.

რაც შეეხება კითხვას, შესაძლო გამარჯვების აღნიშვნას, რატომ არ გეგმავს „ქართული ოცნება“ ქუჩაში და არის თუ არა ამის მიზეზი რუსთაველის გამზირზე მიმდინარე აქცია, კობახიძემ უპასუხა: „მოდით, ნუ წვალობთ, დაელოდეთ ჩვენს ზეიმს და დაელოდეთ საკუთარ ტრაგედიას“.

„წელს ვაკეთებთ იმისგან განსხვავებულ რამეს, რაც გავაკეთეთ ან შარშან, ან 2021-ში, აბ 2020-ში. გამოდის, რომ თქვენი შეკითხვა არარელევანტურია, რადგან დაუკავშირეთ აქციას, რომელიც არ იყო შარშან. შარშან არ იყო აქცია, მაგრამ იმავე ტრადიციით აღვნიშნეთ. მოდით, ნუ წვალობთ, დაელოდეთ ჩვენს ზეიმს და დაელოდეთ საკუთარ ტრაგედიას“,- აღნიშნა კობახიძემ.