ე.წ. ცენტრალურმა საარჩევნო კომისიამ პირველადი შედეგების გამოქვეყნებაც მაქსიმალურად გაწელა. რუსეთი კი უკვე ღიად ჩაერთო პროცესებში - აფხაზეთში მომხდარ ინციდენტსა და ანტისომხურ გამოსვლებზე დე ფაქტო უწყებების ნაცვლად, საქმეები რამდენიმე მუხლით უშუალოდ რუსეთის საგამოძიებო კომიტეტმა აღძრა. ასლან ბჟანიას გუნდის წევრი და რუსეთის მიერ ღიად მხარდაჭერილი ბადრა გუნბა გამაჯვებას ზეიმობს. ე.წ. ცენტრალური საარჩევნო კომისიის საბოლოო შედეგებით სწორედ ის გახდა დე ფაქტო პრეზიდენტი ხმათა 54.73%-ით, მისმა მეტოქემ, ოპოზიციონერმა ადგურ არძინბამ 41.5% მიიღო. აქტივობა კი უჩვეულოდ მაღალი იყო - 70%. დამარცხებული არძინბა ჯერჯერობით დუმს - მას არც დამარცხება უღიარებია და არც “არჩევნების” გაყალბების შესახებ გაუკეთებია განცხადება. სწორედ მას და მის გუნდს ედავება რუსეთის საგამოძიებო კომიტეტი ოკუპირებულ აფხაზეთში ანტისომხური ისტერიის გაღვივებას და გაგრის ერთ-ერთ საარჩევნო უბანზე შეიარაღებულ თავდასხმას, რაზედაც საქმე ტერორიზმის მუხლითაა აღძრული”, - წერს გაზეთი “რეზონანსი” სტატიაში, სათაურით აფხაზი ოპოზიციონერების ნაწილი “საქართველოში გასაქცევად” ემზადება / რუსების ღია ჩარევა და მორიგი მარიონეტის გამარჯვება ე.წ. მეორე ტურში.

“ყოფილი სახელმწიფო მინისტრი და კონფლიქტოლოგი პაატა ზაქარეიშვილი არ გამორიცხავს, რომ რუსეთმა, შემდგომი დაძაბულობის თავიდან ასაცილებლად, არძინბას რუსეთის მოქალაქეობა ჩამოართვას და მის გუნდის წევრებისა და მხარდამჭერების დევნაც დაიწყოს. გუნბასგან კი კრემლი ელოდება მისთვის სასარგებლო კანონების ბოლომდე გატანას, რომელიც ეხება ბიჭვინთის აგარაკებს, აპარტ-ოტელებსა და რუსი ოლიგარქების ინვესტიციებისთვის შეღავათიანი პირობების შექმნას. ზაქარეიშვილის შეფასებით, “არაა გამორიცხული, რომ ახლა ოპოზიცია არჩევნების გამო არ გაბრაზდეს, რადგან თვალში საცემია გუნბას წარმატება. მაგრამ აი, თუ “პარლამენტში” ხელახლა შემოიტანეს ეს სამი თემა, ამან შეიძლება ხელახლა გამოიწვიოს მღელვარება”. სომხების ეთნიკური შევიწროების მოტივით, რუსეთის საგამოძიებო კომიტეტმა ოკუპირებულ აფხაზეთში გამოძიება დაიწყო, როცა არძინბას მომხრეებმა ღიად დაიწყეს აფხაზეთში მცხოვრები სომხების დადანაშაულება იმაში, რომ პირველ ტურში მათ პრინციპულად არ დაუჭირეს მხარი არძინბას... ოკუპირებული აფხაზეთის ე.წ. ცენტრალური საარჩევნო კომისიის მონაცემებით, მეორე ტურში აქტივობა 70% იყო, ე.წ. არჩევნებში მონაწილეობა 100 412-მა ადამიანმა მიიღო, აქედან 2 065-მა აფხაზმა არც ერთ ე.წ. კანდიდატს არ დაუჭირა მხარი”, - აღნიშნავს გამოცემა.

“აფხაზური “ტელეგრამ” არხები წერენ, რომ ბევრი ე.წ. საარჩევნო უბნის შესასვლელთან გაურკვეველი სტატუსის მქონე შეიარაღებული პირები იდგნენ. ყველაზე ხმაურიანი ინციდენტი კი დაახლოებით 19:30-ზე, უბნების დახურვამდე ცოტა ხნით ადრე მოხდა, როდესაც შეიარაღებული პირები გაგრის რაიონის დაბა განთიადის #2 სკოლაში გახსნილ “საარჩევნო უბანს” დაესხნენ თავს, დააზიანეს “საარჩევნო ყუთი”, ბიულეტენები, “საარჩევნო დოკუმენტები”, შემდეგ კი, ავტომობილით გაქცევა სცადეს. თუმცა ე.წ. სამართალდამცავებმა “მიუსერას” საგუშაგო გადაუკეტეს, თავდამსხმელებმა მათი მიმართულებით გახსნეს ცეცხლი, საპასუხო სროლის შედეგად ორი პირია დაჭრილი, მათ სამედიცინო დახმარება დასჭირდათ. მედიის ცნობით, დაჭრილთაგან ერთ-ერთი ნურიკ სმირია, “პრეზიდენტობის” კანდიდატ ადგურ არძინბას ნათესავი. ბადრა გუნბას შტაბმა მომხდარში ადგურ არძინბას მომხრეები დაადანაშაულა, ე.წ. გენერალური პროკურატურის ინფორმაციით, თავდასხმაში დაახლოებით 20 ადამიანი მონაწილეობდა”, - განაგრძობს გამოცემა.

“მსგავსი ინციდენტები ოკუპირებული აფხაზეთისთის ახალი არ არის, თუმცა ამჯერად მნიშვნელოვანი ისაა, რომ აფხაზეთში ე.წ. წესრიგის დაცვა რუსეთის საგამოძიებო კომიტეტმა აიღო თავზე და არა დე ფაქტო შესაბამის უწყებებმა. რუსეთმა აქტიურად ჩართვის მიზეზად დაასახელა ის, რომ ორივე ე.წ. კანდიდატი რუსეთის მოქალაქეა. რუსეთის საგამოძიებო კომიტეტის თქმით, განთიადში მომხდარ დაპირისპირებაზე საქმე აღძრულია “რუსეთის ფედერაციის სისხლის სამართლის კოდექსის 205-ე მუხლით (ტერორისტული აქტი). მათივე ცნობით, არძინბას და მისი მხარდამჭერების ყველა ქმედება “მაქსიმალურად მკაცრად არის კლასიფიცირებული” და ნებისმიერი აქცია, ან პროტესტი “ტერორიზმის ხელშეწყობად” ჩაითვლება. რუსეთის საგამოძიებო კომიტეტის სპეციალური წარმომადგენელი სვეტლანა პეტრენკო დამატებით აცხადებს, რომ მეორე ტურის მიმდინარეობისას “დაფიქსირდა სიცოცხლის ხელყოფის მუქარის და ნების გამოვლენის ხელის შეშლის რამდენიმე ფაქტი”, - დასძენს გამოცემა.

“სოციალური ქსელებით იგრძნობა, რომ პროცესში რუსეთის უსაფრთხოების ძალების ჩართვამ აფხაზური საზოგადოების პრორუსულ ფრთას ოპტიმიზმი გაუჩინა. ტელეგრამ არხი “აპსნი 360”, რომელიც გუნბას უჭერს ღიად მხარს, წერს და მოლოდინი აქვს, რომ “მთელი კრიმინალური ჰიდრა საბოლოოდ დაიშლება, ყველა ნაციონალისტური და ექსტრემისტულ-ტერორისტული განწყობილება ცხელი შანთით ამოიწვება”. აფხაზური ტელეგრამ არხი “ასტანდა ნაშეპტალა” წერს, რომ არძინბას მთავარი მოკავშირე, მისი ბიძაშვილი და ე.წ. კრიმინალური ავტორიტეტი ადამირ ფაჩალია (მეტსახელად “ფაჩახა”), რომელიც “ჩართული იყო პოლიტიკოსის კამპანიის ძალისმიერ მხარდაჭერაში”, უკვე გეგმავს “გაქცევას საქართველოში”. მათივე ცნობით, “სწორედ მან მოაწყო შეიარაღებული თავდასხმები საარჩევნო უბნებზე იმ იმედით, რომ არჩევნებს ჩაშლიდა”, თუმცა, რუსეთის უშიშროების ძალების აქტიური ჩართვისა და საკუთარი უსაფრთხოების გამო, “გეგმები სასწრაფოდ შეიცვალა”. ზაქარეიშვილი აცხადებს, რომ ე.წ. კანდიდატებს შორის დიდი სხვაობაა და აშკარად ბადრა გუნბას გამარჯვება ჩანს, რაც დიდი ალბათობით სომხური დიასპორის აქტივობამ გამოიწვია. მისი თქმით, პროცესში ყველაზე უჩვეულო ის, არის რომ გამოძიებებში რუსეთი უშუალოდ ჩაერთო, რაც ნიშნავს იმას, რომ კრემლმა მოსალოდნელ პროტესტზეც იზრუნა და ახლა არძინბას მომხრეების დაკავებების სერიას დაიწყებს”, - წერს სტატიის ავტორი.

“მიუხედავად იმისა, რომ გაყალბება, მანიპულაცია და ზემოქმედება იყო, გუნბასა და არძინბას შედეგებს შორის 14%-ია განსხვავება. ეს მაინც დიდი პროცენტია და აშკარად ჩანს, რომ გუნბამ გაიმარჯვა. მეც ვფიქრობდი, რომ გუნბა გაიმარჯვებდა, მაგრამ არა ასეთი უპირატესობით. 2004 წლის შემდეგ, პირველად თვალში საცემი იყო პოლარიზაცია, არჩევნების მიმართ უნდობლობა და გაყალბების ფაქტები. აფხაზეთის ტერიტორიაზე დე ფაქტო არჩევნები მეტ-ნაკლებად მშვიდობიანად ტარდება ხოლმე. როგორც წესი, მხარეები ანგარიშს უწევდნენ შედეგებს და ეჭქვეშ არ აყენებდნენ და პროტესტს არ აცხადებენ. მაგრამ ახლა აშკარად ჩანს, რომ სერიოზული დარღვევები იყო. მიუხედავად ამისა, გუნბამ ნამდვილად მიაღწია წარმატებას. გაყალბებაც რომ არ ყოფილიყო, განსხვავება დაახლოებით 5-6% იქნებოდა გუნბას სასარგებლოდ. მოსალოდნელია, რომ დაძაბულობა არ ჩაცხრება. აქ ერთი მომენტია, რაც არასდროს არ ყოფილა - რუსეთი ძალიან უტიფრად ჩაერთო. ადრე რუსეთი ყოველთვის გავლენას ახდენდა, მაგრამ ასე ღიად ჩართული არ ყოფილა, როგორც მესამე მხარე”, - აცხადებს გამოცემის კორესპონდენტთან საუბრისას პაატა ზაქარეიშვილი.

“ადრე ორივე “კანდიდატს” მხარს უჭერდა, ახლა კი სისხლის სამართლის საქმეები აღძრა ეთნიკური სომხების წინააღმდეგ წარმოებული გამოსვლების გამო. ეს ძალიან სერიოზული გამოწვევაა, რაც აძლიერებს განხეთქილებას სომხებსა და აფხაზებს შორის და ეს შეგნებულად კეთდება. რუსეთმა ძალიან კარგად იცის, რომ თუ სომხებს მხარი დაუჭირა, ამით აფხაზებს კიდევ მეტად გააღიზიანებს. ამას შეგნებულად და სპეციალურად აკეთებს, რომ დაძაბულობა შეიტანოს. ანტისომხური კამპანიები გაგრძელდება. აფხაზურ საზოგადოებაში ადრეც არ იყო სიმპათიები სომხების მიმართ, მაგრამ რაღაცნაირად დადებითად ფუთავდნენ. ახლა ანტისომხური ჯინი ბოთლიდან გამოვიდა და მისი უკან შედენა არ გამოუვათ, რადგან რუსეთი უწყობს ამას ხელს. გუნბა რუსეთს არაფერში არ სჭირდებოდა გარდა იმისა, რომ აფხაზეთმა უნდა შეასრულოს ის ვალდებულებები, რაც ბჟანიას დროს იყო რუსეთის წინაშე - ბიჭვინთის მიწა უნდა გადაეცეს რუსებს საბოლოოდ, რომელიც ჯერ კიდევ დაუმთავრებელი თემაა; ასევე აპარტ-ოტელების დაკანონება - მშენებლობა დაიწყო, მაგრამ დაკანონებული არაა და ეს არის რუსი ოლიგარქებისთვის შეღავათიანი პირობების შექმნა აფხაზეთის ტერიტორიაზე. ამის წინააღმდეგ წავიდა აფხაზური საზოგადოება და ბჟანია გაისტუმრა, მაგრამ ბჟანია გუნბას სახით დაბრუნდა”, - განმარტავს კონფლიქტოლოგი.

“შესაბამისად, რუსეთი მოსთხოვს, რომ პირობები შეასრულოს. ახლა რუსეთი იმ ლიდერების დაპატიმრებებს დაიწყებს, ვინც შემჩნეულები არიან სომხური თემის წინააღმდეგ გამოსვლებში. ბევრ მათგანს რუსეთის მოქალაქეობას ჩამოართმევს, აუკრძალავს რუსეთში გადაადგილებას, აღძრავს სისხლის სამართლის საქმეებს და პრაქტიკულად გუნბას წინასწარ მოუმზადებს ნიადაგს, რათა ხალხი ქუჩაში არ გამოვიდეს, როცა ისინი ე.წ. პარლამენტში განიხილავენ ამ საკითხებს. დაძაბულობა გაგრძელდება, როგორც შიდა აფხაზური - გუნბა-არძინბას შორის, ასევე ეთნიკური სომხების წინააღმდეგ, რაც რუსეთს აწყობს, ამაზე ხელს მოითბობს. მაგრამ ეს არ ნიშნავს, რომ მას ყველაფერი გაუვა. არაა გამორიცხული, რომ ახლა ოპოზიცია არჩევნების გამო არ “გაბრაზდეს”, რადგან თვალში საცემია გუნბას წარმატება. მაგრამ აი, თუ “პარლამენტში” ხელახლა შემოიტანეს ეს სამი თემა, ამან შეიძლება ხელახლა გამოიწვიოს მღელვარება. ამას ალბათ რამოდენიმე თვეში ვნახავთ”, - მიიჩნევს ყოფილი სახელმწიფო მინისტრი.

“არძინბამ ახლა ან უნდა მიულოცოს გუნბას, ან გააკრიტიკოს და გასაკრიტიკებელი ცოტა რამაა, რადგან ფაქტია, რომ წარმატებას ვერ მიაღწია. რაც მთავარია, არძინბას ხალხს ბრალდება არეულობები. ახლა დაიწყება პროცესები არძინბას წინააღმდეგ. უკეთეს შემთხვევაში, ალბათ, რუსეთის მოქალაქეობა ჩამოერთმევა, უარეს შემთხვევაში შეიძლება ტერორიზმი დაბრალდეს. ადრე აფხაზეთის ტერიტორიაზე რუსეთის მოქალაქე ბიზნესმენებიც მოუკლავთ და მაშინ არ აღუძრავთ რუსებს სისხლის სამართლის და ახლა ათობით საქმე აღძრეს, როცა სომხები აფხაზეთის მოქალაქეებიც არიან და აფხაზეთის მოქალაქეებს შორის არის დაძაბულობა. ეს ძალიან უცნაური რამაა, რასაც აშკარად პოლიტიკური სარჩული აქვს, რომლის ამოცანაა როგორმე შუღლი გააღრმავოს. ასე ჩანს, რომ სადაც სროლა იყო, იქ მეტწილად სომხები აძლევდნენ ხმას. საბოლოო ჯამში, როცა ბიულეტენები გამოქვეყნდება, ანალიზი აჩვენებს სომხების ხმებმა რა გარდატეხა შეიტანა, მაგრამ ყველაფერი აქეთკენ მიდის და ჩანს, რომ სადაც სომხები ცხოვრობენ, იქ ცალსახად და მკაფიოდ გუნბამ გაიმარჯვა. ანალიზის შემდეგ თუ გამოჩნდა, რომ სუფთა აფხაზურ რაიონებში არძინბამ გაიმარჯვა, მაშინ დადასტურდება, რომ სომხების ხმები გადამწყვეტი იყო”, - დაასკვნის პაატა ზაქარეიშვილი.