მისივე თქმით, მთავარი გადაწყვეტილება ქართველი ხალხის მისაღებია და ოპოზიციის ერთიანობა მნიშვნელოვანია.

„აქ ჩემით მოვედი. გასაგები იყო რა გადაწყვეტილებას გამოიტანდა სასამართლო და ვიცი როგორ მოჰყავთ – ხოლმე, ხელბორკილებითა და პოლიციის მანქანით. მერჩივნა ჩემით მოვსულიყავი. პატრულს ვაცნობე, რომ აქ ვარ. ალბათ შემასახლებენ ამ ციხეში ან სხვაში. კანონით აქ მეკუთვნის, მაგრამ მაინც. რაც შეეხება იმას, რაც ხდება, ეს არის ბრძოლა თავისუფლებისთვის რუსეთის წინააღმდეგ, ამიტომ ყველანი ყველაფრისთვის უნდა ვიყოთ მზად.

საერთაშორისო თანამეგობრობა ბუნებრივია, რომ ადეკვატურად მოახდენს რეაგირებას,  თუმცა მთავარი გადაწყვეტილება ქართველი ხალხის მისაღებია. ველოდები, რომ ოლიგარქია დაემხობა და ჩვენ ისევ გავხდებით ქვეყანა, რომელიც მიდის ევროპისკენ და მივაღწევთ იქამდე აუცილებლად.

რაც შეეხება ოპოზიციის ერთიანობას, ის ძალიან მნიშვნელოვანია, იმიტომ, რომ გადამწყვეტი მომენტია ჩვენი სამშობლოსთვის”,- განაცხადა ნიკა გვარამიამ.

ცნობისთვის, მოსამართლემ, ნიკა გვარამიას აღკვეთის ღონისძიების სახით შეფარდებული გირაო პატიმრობით შეუცვალა. ნიკა გვარამია საქართველოს პარლამენტის დროებით საგამოძიებო კომისიაზე ახსნა-განმარტების მისაცემად დაიბარეს, სადაც ის არ გამოცხადდა. აღნიშნულთან დაკავშირებით მას ბრალი სისხლის სამართლის კოდექსის 349-ე მუხლით აქვს წარდგენილი, რაც “საქართველოს პარლამენტის დროებითი საგამოძიებო კომისიის მოთხოვნის შეუსრულებლობას” გულისხმობს, აღნიშნული ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

ნიკა გვარამიას აღკვეთის ღონისძიების სახით 30 000-ლარიანი გირაო ჰქონდა შეფარდებული, რომლის გადასახდელად 50-დღიანი ვადა განესაზღვრა. მას აღნიშნული ვადა 7 ივნისს ამოეწურა.