“აფხაზებს კორონავირუსის პანდემიასთან გასამკლავებლად არც მატერიალური რესურსები აქვთ და არც ადამიანური, რუსეთი კი დახმარების კუთხით დიდად არ აქტიურობს. ბევრი ადამიანი, ძირითადად გალელები, დახმარებისთვის საქართველოს ცენტრალური ხელისუფლების მიერ კონტროლირებულ ტერიტორიაზე გადმოდის. ვრცელდება ცნობები, რომ აფხაზ და ქართველ ექიმებს შორის ერთგვარი არაოფიციალური კომუნიკაცია დამყარდა. აღსანიშნავია, რომ აფხაზი “მესაზღვრეები” კორნავირუსის სიმოტმების მქონე ადამიანებს აფხაზები ზუგდიდში სამკურნალოდ თავისუფლად უშვებენ. ზუგდიდში, ოკუპირებული აფხაზეთიდან დღეის მდგომარეობით 7 ადამიანი გადმოიყვანეს. ისინი საკარანტინე ზონაში არიან მოთავსებულნი. მოქალაქეები საქართველოს კონტროლირებად ტერიტორიაზე საბერიო-ფახულანის ე.წ. გამშვები პუნქტის გავლით შემოვიდნენ”, - წერს გაზეთი “რეზონანსი” სტატიაში სათაურით პანდემიამ რუსებისგან მიტოვებული აფხაზები აიძულა საქართველოსკენ გამოეხედათ.
“საქართველოს ჯანდაცვის მინისტრის ბრძანებით, დამტკიცდა ახალი ალგორითმი, რომლის მიხედვითაც განისაზღვრება, რომელი სახის ტესტი პაციენტების რომელ ჯგუფში უნდა იქნას გამოყენებული. ამის შესახებ ჯანდაცვის მინისტრის მოადგილემ, თამარ გაბუნიამ სპეციალურად გამართულ ბრიფინგზე განაცხადა. შეცვლილი პროტოკოლის შედეგად რისკის ზონაში მყოფი პაციენტები სამ კატეგორიად იყოფა. პირველი ეტაპი იქნება, ვისაც მოგზაურობის ისტორია აქვს და მაღალი ტემპერატურა აღენიშნება. მეორე კატეგორიაში ვისაც ტესტირება ჩაუტარდება მათ, რომელთაც შეხება რისკზონიდან ჩამოსულ პირებთან ჰქონდათ. მესამე კატეგორიაში კი მოხვდებიან ის პირები, ვისაც უბრალოდ ტემპერატურა უფიქსირდებათ და საეჭვო პაციენტებად მიიჩნევენ”, - წერს გაზეთი “რეზონანსი” სტატიაში სათაურით რას ითვალისწინებს ახალი პროტოკოლი და რა შემთხვევაში მიიჩნევა ადამიანი ვირუსზე საეჭვოდ.
კოვიდ-19-ის გავრცელების გამო, ბრიტანეთის ეროვნული ჯანდაცვის სამსახური (NHS) იძულებული გახდა, სარეანიმაციო განყოფილებაში პაციენტის მოთავსების კრიტერიუმები მნიშვნელოვნად შეეზღუდა. ამ თემაზე ჟურნალისტებს ქვეყნის მთავარი სამედიცინო ოფიცრის მოადგილე, ექიმი ჯენი ჰარისი კვირას ესაუბრა.
საფრანგეთის პრეზიდენტის, ემანუელ მაკრონის ინფორმაციით, საფრანგეთი სტრატეგიული სამედიცინო ნაწარმის წარმოებაში 4 მილიარდი ევროს ინვესტიციას ჩადებს. მისი თქმით, ევროპა სხვა ქვეყნებზე დამოკიდებული აღარ უნდა იყოს.
სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე მიმართვას ავრცელებს, რომლის ტექსტსაც უცვლელად გთავაზობთ:
ქუთაისის მერმა გიორგი ჭიღვარიამ ქალაქის შემოსასვლელებში გახსნილი საკონტროლო-გამშვები პუნქტები მოინახულა პარლამენტის მაჟორიტარ დეპუტატ დიმიტრი მხეიძესთან ერთად და იქ არსებულ მდგომარეობას გაეცნო.
„დაუშვებელია ვალუტის გადამცვლელი პუნქტების დახურვა - ვალუტის ყიდვა-გაყიდვა ექსკლუზიურად აღმოჩნდება მხოლოდ ბანკების ხელში“ - ასე ეხმაურება ფრაქცია "ნაციონალური მოძრაობის" თავმჯდომარე რომან გოცირიძე "ფეისბუქის" საკუთარ გვერდზე ეროვნული ბანკის განცხადებას.
საქართველოს ხელისუფლება კორონავირუსის პანდემიის გამო შექმნილი ეკონომიკური შოკის დასაძლევად ანტიკრიზისულ გეგმას უახლოეს დღეებში წარადგენს. მანამდე კი მთავრობამ ბიზნესს გარკვეული გადასახადები უკვე გაუუქმა და მოსახლეობას სხვადასხვა ჯარიმების გადახდის ვადა გაუხანგრძლივა. 3-თვიანი საშეღავათო პერიოდი დაუწესეს კომერციულმა ბანკებმა მსესხებლებს.
„საქართველოს მთელ ტერიტორიაზე საგანგებო მდგომარეობის გამოცხადებასთან დაკავშირებით გასატარებელ ღონისძიებათა შესახებ“ საქართველოს პრეზიდენტის 21 მარტის №1 დეკრეტის აღსრულების მიზნით, მიმდინარე წლის 26 მარტიდან, საქართველოს შინაგან საქმეთა სამინისტრომ დაიწყო დროებითი მოთავსების იზოლატორებიდან სისხლის სამართლის წესით დაკავებული პირების სასამართლო პროცესების დისტანციურად წარმოება.
