მსვლელობა 14.30 საათზე წერეთლის სახ. უნივერსიტეტიდან დაიწყო  და მერიის შენობასთან დასრულდა. 

ღონისძიების მთავარი მიზანი და მოთხოვნები იყო:

1. აიკრძალოს აბორტი.

2. აიკრძალოს სქესის გამხელა ორსულობის 12 კვირამდე სელექციური აბორტის თავიდან აცილების მიზნით.

3. აბორტის წინა 5 დღიანი მოსაფიქრებელი ვადა გახდეს ქმედითი, რაც მოიაზრებს კონფიდენციალურ პირობებში სპეციალისტებთან გასაუბრებას, პრობლემის გამოვლენას და ქალის სრულ ინფორმირებას მოსალოდნელ შედეგებზე. 

4. დემოგრაფიული კრიზისიდან გამოსვლის მიზნით სახელმწიფომ იზრუნოს საოჯახო პოლიტიკის გაუმჯობესებაზე საქართველოში: - სამ შვილიანი ოჯახი ჩაითვალოს მრავალშვილიანად. - სავალდებულო გახდეს კერძო თუ საჯარო დამსაქმებლისთვის 12 თვემდე დეკრეტული შვებულების ანაზღაურება. - საყოველთაო დაზღვევით გათვალისწინებულ იქნეს 0-დან 6 წლამდე ბავშვებისათვის მედიკამენტების ვაუჩერი.

აღნიშნულ მოთხოვნებზე FirstNews.ge - თან ორგანიზაციის ექსპერტ-მეთოდისტმა ნანა ნებიერიძემ ისაუბრა:

"12 კვირის ჩათვლით საქართველოში ვადამდე ხელოვნური აბორტი ყოველგვარი ჩვენების გარეშეა დაშვებული (ქალის სურვილზეა დამოკიდებული). 2017 წლის მონაცემებით ხელოვნური აბორტები დაახლოებითი 30 000-მდეა.

უკანასკნელი 25 წლის განმავლობაში კი საქართველოში 30 ათასზე მეტი გოგო არ დაიბადა სელექციური აბორტების შედეგად - იმის გამო, რომ მათ მშობლებს ბიჭები სურდათ. სპეციალისტების აზრით, ქვეყნის დემოგრაფიული მდგომარეობისთვის ეს კატასტროფული რიცხვებია,"-განაცხადა ნანა ნებიერიძემ.

აღნიშნულ მსვლელობას FirstNews.ge-თან საუბარში გამოეხმაურა ღონისძიების ორგანიზატორი ანნამარია კრიველარი:

"ასეთი მსვლელობები არის ერთ - ერთი საშუალება, რომ დავიცვათ მუცლადმყოფი ბავშვის სიცოცხლე, მაგრამ არა მარტო ამ ბავშვის, ასევე სხვა დაუცველის: შშმ პირების, ავადმყოფების, მოხუცების. ჩვენს საზოგადოებას, რომელიც მარტივად ფიქრობს მუცლადმყოფი ბავშვის მოკვლაზე, ასევე, სათანადო ყურადღებასა და მხარდაჭერას არ ავლენს ავადმყოფების ან მოხუცების მიმართ, რომლებსაც არა აქვთ მკურნალობისათვის პირობები, სჭირდება ამ მიმართვის მეშვეობით გამოფხიზლება. აი, რატომ არის საჭირო ხმამაღლა ყვირილი, რომ ვიხსნათ და წავახალისოთ სიცოცხლე! აი, ამიტომ არის მნიშვნელოვანი, რომ ვიყოთ ბევრი!"