ინტერვიუში ამერიკელი პოლიტოლოგი საქართველოსა და უკრაინის ევროატლანტიკურ პერსპექტივაზეც საუბრობს, აშშ-რუსეთის ურთიერთობის ფონზე.   

გთავაზობთ ამონარიდს პუბლიკაციიდან:

- რუსეთისა და აშშ-ის პრეზიდენტები მეორე სამიტისათვის ემზადებიან. რას ურჩევდით ჯო ბაიდენს მოსკოვთან ურთიერთობის აწყობის მიზნით?

- მე მას ვურჩევდი, რომ რუსეთთან ურთიერთობის გასაუმჯობესებლად კონკრეტული ნაბიჯები გადადგას. კერძოდ, კარგი იქნება, რომ ჯო ბაიდენს ნატოს გაფართოებაზე ლაპარაკი შეწყვიტოს. აშშ-ის თავდაცვის მინისტრმა ლოიდ ოსტინმა ამას წინათ მიანიშნა, რომ ვაშინგტონი ჯერ კიდევ არის დაინტერესებული საქართველოსა და უკრაინის ნატოში მიღებით. ეს უდიდესი შეცდომაა, რაც გარანტირებულად რუსეთთან კონფრონტაციას გამოიწვევს. ამიტომაც, ჩემი აზრით, ჯო ბაიდენმა უნდა უთხრას ვლადიმერ პუტინს, რომ ნატოს გაფართოება დასრულდა, საქართველო და უკრაინა ალიანსის წევრები არ გახდებიან.

უფრო მეტიც: ჯო ბაიდენს შეუძლია მიანიშნოს ვლადიმერ პუტინს ასეთი რამ: მას, აშშ-ის პრეზიდენტს, კარგად ესმის, რომ რუსეთს მნიშვნელოვანი სტრატეგიული ინტერესები აქვს აღმოსავლეთ ევროპაში, რომელიც მოსკოვისათვის ერთგვარ „უკანა ეზოს“ წარმოადგენს. დღეს ამერიკა ფიქრობს, რომ ამ რეგიონს რუსეთისათვის არანაირი მნიშვნელობა არ უნდა ჰქონდეს და რომ რუსეთის შეშფოთება ნატოს აღმოსავლეთით გაფართოებაზე უსაფუძვლო და მცდარია. ვაშინგტონის ასეთი პოზიცია სასაცილოა. რასაკვირველია, რუსეთი ძალიანაა დაინტერესებული ძალთა ბალანსით აღმოსავლეთ ევროპაში, რომელიც პირდაპირ მისი კარის ზღურბლთან მდებარეობს. თუ ჯო ბაიდენი ეტყვის ვლადიმერ პუტინს, რომ იგი მხედველობაში იღებს მოსკოვის ინტერესებს, ეს ძალიან კარგ გავლენას მოახდენს ორმხრივ ურთიერთობაზე.

სხვათა შორის, მე ვთვლი: თუ ამერიკა მკაფიოდ განაცხადებს, რომ საქართველო და უკრაინა ნატოს წევრები არ გახდებიან, ეს თვით ამ ქვეყნებისათვის იქნება სასარგებლო.

- ძალიან მეეჭვება, რომ ორივე ქვეყანას ასეთი პერსპექტივა ძალიან გაახარებს...

- ეს იმიტომ, რომ ისინი ჯიუტები არიან. საქართველო და უკრაინა ვერ ხვდებიან იმას, რომ ისინი ჩრდილოატლანტიკურ ალიანსში ვერასოდეს ვერ შევლენ და სანამ ორივე მაინც ნატოსკენ ისწრაფვის, მანამ რუსეთი მათ ყოველთვის პრობლემებს შეუქმნის. მოსკოვს აქვს ბერკეტები, რომლის დახმარებით ამ ქვეყნების ნატოში ინტეგრაცია თავიდან აიცილოს. კარგად მესმის, რომ საქართველოსა და უკრაინისთვის ძალიან ძნელი იქნება უარი თქვან თავიანთ სწრაფვაზე, მაგრამ დარწმუნებული ვარ, რომ მათ არასწორი კურსი აქვთ არჩეული.

წყარო: https://www.kommersant.ru/doc/5061742