მოსკოვისა და მინსკის შეთანხმებით, ბელარუსის ტერიტორიაზე, "რეგიონული დაჯგუფების" შემადგენლობაში 9 ათასამდე რუსი სამხედრო მოსამსახურე განლაგდება. სამხედრო ტექნიკითა და პირადი შემადგენლობით დატვირთული ეშელონების ჩასვლა ბელარუსში 15 ოქტომბრიდან გრძელდება. ხოლო მთელი ეს მოძრაობა ბელარუსში და ერთობლივი "რეგიონული დაჯგუფების" შექმნის საჭიროება, როგორც ალიაქსანდრ ლუკაშენკამ განაცხადა, განპირობებული ყოფილა „უკრაინის ტერიტორიიდან მოსალოდნელი დარტყმების საფრთხით“.

მაგრამ ბელარუსის ავტოკრატი ლიდერის არცერთი სიტყვის არ სჯერათ კიევში, სადაც კარგად ახსოვთ, რომ სწორედ ბელარუსის ლიდერის თანხმობითა და ბელარუსის ტერიტორიის გავლით შეიჭრა რუსეთის არმია მიმდინარე წლის გაზაფხულზე კიევის, ჩერნიგოვისა და სუმის ოლქებში.

მაშინაც რუსეთი მიზნად ისახავდა იმ ლოგისტიკური არტერიების გადაჭრას, რომლითაც უკრაინის არმია დასავლეთის ქვეყნების სამხედრო დახმარებას იღებს.

„უკრაინის არმიისთვის ლოგისტიკური არტერიის გადაჭრაზე რუსეთი დიდი ხნის წინ ალაპარაკდა და დიდი ხნის წინ, მასშტაბური აგრესიული ომის პირველ დღეებში აპირებდა ამ ეფექტის მიღწევას. მაგრამ კრემლმა გაზაფხულზე ეს ვერ შეძლო, რადგან მისი დაჯგუფება კიევის, ჩერნიგოვისა და სუმის ოლქებში განადგურდა. ახლა მოსკოვი და მინსკი ცდილობენ შექმნან ახალი დაჯგუფება, მაგრამ ჯერჯერობით მათ ფიზიკურად არ აქვთ ძალა და არ ჰყოფნით რეზერვი ამ ამოცანის შესასრულებლად“, - უთხრა რადიო თავისუფლებას სამხედრო ექსპერტმა მიხაილო სამუსმა.

უკრაინის შეიარაღებული ძალების გენერალური შტაბი მიიჩნევს, რომ ბელარუსის ტერიტორიიდან განმეორებითი შეტევის საფრთხე იზრდება. უკრაინის შეიარაღებული ძალების გენერალური შტაბის მთავარი ოპერატიული სამმართველოს უფროსის მოადგილემ, ბრიგადის გენერალმა ალექსეი გრომოვმა პრესკონფერენციაზე რამდენიმე ოპერატიულ ფაქტორზე გაამახვილა ყურადღება:

- ბელარუსის ტერიტორიაზე გრძელდება რუსეთის ფედერაციის შეიარაღებული ძალების საავიაციო და სხვა დანაყოფების გადასროლის პროცესი;

- ბელარუსის ტერიტორიაზე მიმდინარეობს ფარული სამობილიზაციო ღონისძიებები;

- მინსკი თავის ტერიტორიას უთმობს რუსეთს, უკრაინის მიმართულებით ბალისტიკური რაკეტებისა და თვითმფრინავების გაშვებისთვის;

- ბელარუსის რესპუბლიკის აეროდრომებზე განლაგებულია რუსული MiG-31 კლასის თვითმფრინავი, რომელიც "კინჟალის" ტიპის ბალისტიკური რაკეტით არის აღჭურვილი.

უკრაინელი გენერლის თანახმად, ბელარუსის შეტევის განმეორების შემთხვევაში რუსეთის სარდლობა აქცენტს ბელარუს-უკრაინის საზღვრის დასავლეთის მიმართულებაზე გააკეთებს. სამხედრო ექსპერტები ვარაუდობენ, რომ ეს შეიძლება იყო ვოლინის მიმართულება, რომლის გავლითაც უკრაინის არმია დასავლეთის სამხედრო დახმარებას იღებს.

„მართლაც, დაჯგუფება, რომელსაც რუსეთი და ბელარუსი ერთობლივად ქმნიან, მიზნად ისახავს ჩრდილოეთის მხრიდან უკრაინაზე თავდასხმას. მაგრამ შეტევა შესაძლოა რამდენიმე მიმართულებაზე განხორციელდეს. როგორც ჩრდილოეთიდან, კიევის და ჩერნიგოვის ოლქებზე, ასევე დასავლეთით ვოლინის მიმართულებით. სწორედ დასავლეთის, ანუ ვოლინის მიმართულებაზე შეტევა უნდა ემსახურებოდეს კოლექტიური დასავლეთისგან საბრძოლო იარაღის და სამხედრო ტექნიკის მიწოდების ლოგისტიკური გზების გადაჭრას“, - განმარტავს რადიო თავისუფლებასთან ინტერვიუში უკრაინელი სამხედრო ექსპერტი, მიხაილო სამუსი.

როგორც ზემოთ ითქვა, ამჟამად ბელარუსის ტერიტორიაზე, ერთობლივი „რეგიონული დაჯგუფების“ ფარგლებში, დაახლოებით 10 ათასი რუსი ჯარისკაცი იმყოფება. ეს ძალიან ცოტაა იმისთვის, რომ რუსეთმა უკრაინის ტერიტორიაზე ერთბაშად რამდენიმე მიმართულებით განავითაროს შეტევა. ამიტომ არსებობს მოსაზრება, რომ რუსეთი შეეცდება გაზარდოს ეს დაჯგუფება რუსეთიდან მობილიზებული რეზერვისტებისა და საკუთრივ ბელარუსი მოხალისეების ხარჯზე.

„ჩემი პროგნოზით, რუსეთი ამას მხოლოდ ბელარუსში თავისი დაჯგუფების, მობილიზებულების ხარჯზე, მკვეთრად გაზრდით შეძლებს. მაგრამ ეს არ არის დღევანდელი დღის საფრთხე, რადგან მობილიზებული რეზერვისტების ბელარუსში გადმოსროლას და მის სათანადო მომზადებას თვეზე მეტი დრო დასჭირდება. დიდი ალბათობით, სადღაც ნოემბრის ბოლოს, ზამთრისთვის რუსეთი და ბელარუსი რეალური შეტევით დაემუქრებიან უკრაინას, მაგრამ დღეს ასეთი მუქარა არ არსებობს“, - დასძენს მიხაილო სამუსი.

ამ ხნის განმავლობაში კი უკრაინის ხელმძღვანელობა თავისუფლად შეძლებს მოსალოდნელი იერიშის ყველაზე სავარაუდო მიმართულებაზე შესაბამისი ტექნიკისა და ცოცხალი ძალის კონცენტრაციას, რათა ჩაფუშოს მოწინააღმდეგის ჩანაფიქრი.

„პუტინსაც და ლუკაშენკასაც უნდა ახსოვდეთ, რომ უკრაინის არმია ახლა ბევრად უფრო უკეთ არის აღჭურვილი და მომზადებული, ვიდრე რუსეთის ინტერვენციის წინ იყო“, - ამბობს მიხაილო სამუსი.