პრეზიდენტმა დონალდ ტრამპმა ლოს-ანჯელესში ეროვნული გვარდიის 2000 წარმომადგენლის გაგზავნის პირველი ბრძანება 8 ივნისს გასცა, როგორც თავად განაცხადა, „მიგრანტების შეჭრისა“ და „ოკუპაციისგან“ ლოს-ანჯელესის გასათავისუფლებლად და არეულობების დასასრულებლად.

კალიფორნიის შტატის ხელისუფლებამ პრეზიდენტის ადმინისტრაცია სიტუაციის ხელოვნურად გამწვავებაში დაადანაშაულა. შტატის დემოკრატმა გუბერნატორმა გევინ ნიუსომმა პრეზიდენტ დონალდ ტრამპის ადმინისტრაციისგან მოითხოვა, გააუქმოს ლოს-ანჯელესში ეროვნული გვარდიის „უკანონოდ განთავსების“ გადაწყვეტილება და სიტუაციის მართვა ადგილობრივ ხელისუფლებას დაუბრუნოს. კალიფორნიის შტატმა სასამართლოსაც მიმართა.

9 ივნისს აშშ-ის თავდაცვის სამინისტროს პრესმდივანმა შონ პარნელმა გამოაცხადა, რომ პრეზიდენტის ბრძანებით, სამინისტროს მიერ მობილიზებულია კიდევ 2000 კალიფორნიელი გვარდიელი, რომლებიც დახმარებას გაუწევენ საიმიგრაციო და საბაჟო სამსახურს, რათა ფედერალურმა სამართალდამცავმა ორგანოებმა თავიანთი მოვალეობა უსაფრთხოდ შეასრულონ.

თავდაცვის მინისტრმა პიტ ჰეგსეთმა 9 ივნისს სოციალურ ქსელ X-ში დაწერა, რომ ფედერალური სამართალდამცავი ორგანოების თანამშრომელებისა და ფედერალური შენობების მიმართ გაზრდილი საფრთხის გამო 700-მდე საზღვაო ქვეითს წესრიგის აღსადგენად კემპ-პენდლტონის ბაზიდან ლოს-ანჯელესში აგზავნიან.

იმავე დღეს აშშ-ის შეიარაღებული ძალების ჩრდილოეთის სარდლობამ გამოაქვეყნა ფოტოები, თუ როგორ ემზადებიან საზღვაო ქვეითები ლოს-ანჯელესში გასამგზავრებლად.