ამ 150 მილიონი ევროს სესხიდან ნახევარი ჩამოირიცხა შარშან და მეორე ნახევარი, მაშინ როგორც გადაწყდა, მიბმული იყო სასამართლო რეფორმაზე. მინდა ყველას შევახსენო, მათ შორის ევროპარლამენტარებს, რომ ჩვენ კარგად ვიცით და გვახსოვს, თუ როგორი სასამართლო ჩაიაბარა „ქართულმა ოცნებამ“, - ამის შესახებ პრემიერ-მინისტრმა, ირაკლი ღარიბაშვილმა ჟურნალისტებს განუცხადა.

მისი თქმით, მას შემდეგ მმართველმა პარტიამ არაერთი რეალური და ხელშესახები რეფორმა განახორციელა. ღარიბაშვილის განცხადებით, სასამართლო რეფორმა მომავალშიც გაგრძელდება.

„სასამართლო რეფორმის ოთხმა ტალღამ რეალურად გამჭვირვალე და ანგარიშვალდებული გახადა სისტემა. გარდა ამისა, დღეს არსებული სასამართლო სისტემა ბევრად წინ უსწრებს ევროკავშირის მოქმედი წევრი სახელმწიფოების სასამართლო სისტემას. ეს ყველა კვლევით დასტურდება, მათ შორის ევროკავშირის გამოკითხვებით და ძალიან მაღალი რეიტინგის მქონე ორგანიზაციების მიერ ჩატარებული კვლევებით. რა თქმა უნდა, ჩვენ რეფორმებს ვაგრძელებთ, სასამართლო რეფორმაც გაგრძელდება“, - განაცხადა ირაკლი ღარიბაშვილმა.