სტოლტენბერგმა მოუწოდა ნატო-ს მოკავშირეებს, მხარი დაუჭირონ საქართველოს და აღნიშნა, რომ ეს იყო ასევე გზავნილი მოკავშირე ქვეყნების ლიდერებისადმი დღევანდელ შეხვედრაზე.

„ჩვენ უნდა გავაცნობიეროთ, რომ ვდგავართ უსაფრთხოების სრულიად ახალი რეალობის წინაშე, რომელიც აზარალებს უკრაიანელ ხალხს, ეს მათთვის გამანადგურებელია; თუმცა, ის ასევე მეტ ზეწოლას ახდენს იმ ქვეყნებზეც ჩვენს სამეზობლოში, რომლებიც არ არიან ნატო-სა და ევროკავშირის წევრები და არიან რისკის წინაშე. საქართველო ერთ-ერთ მათგანია. საქართველოს თავდაცვის მინისტრი ესწრებოდა შეხვედრას. ყველა მოკავშირე ძალიან ყურადღებით უსმენდა მის გამოსვლას, რა დროსაც მან ისაუბრა გამოწვევებზე, რომელთა წინაშეც დგას საქართველო, როგორც ქვეყანა, რომელმაც უკვე იხილა რუსეთის აგრესიული ქმედებების შედეგები 2008 წელს და რუსეთის სხვა მცდელობები, ჩაერიოს საქართველოს საშინაო საქმეებში. ასე რომ, ერთ-ერთი გაკვეთილი, რომელიც უნდა ვისწავლოთ იქიდან, რაც დღეს უკრაინაში ხდება, არის ის, რომ ჩვენ მხარი უნდა დავუჭიროთ იმ ქვეყნებს, რომლებიც რისკის წინაშე ახლა არიან. უმჯობესია, მათ ახლა დავუჭიროთ მხარი და დავეხმაროთ, ვიდრე სამხედრო ინტერვენციის შემდგომ. ვფიქრობ, ახლა ჩვენ ვხედავთ უკრაინისთვის ინტერვენციამდე გაწეული მხარდაჭერის ღირებულებას, თუმცა ასევე იმის მნიშვნელობას, თუ რისი გაკეთება შეგვეძლო დამატებით უკრაინისთვის. ასევე, ვფიქრობ, ეს არის გზავნილი საქართველოსთვის, რომ ჩვენ უნდა გავაძლიეროთ ჩვენი მხარდაჭერა და რომ ჩვენ მხარს ვუჭერთ საქართველოს სუვერენიტეტსა და ტერიტორიულ მთლიანობას არა მხოლოდ სიტყვებით, არამედ საქმითაც. შესაბამისად, მე მოვუწოდებ ნატო-ს მოკავშირეებს, მხარი დაუჭირონ საქართველოს. ეს იყო ასევე გზავნილი მოკავშირე ქვეყნების ლიდერებისადმი დღევანდელ შეხვედრაზე“, – განაცხადა იენს სტოლტენბერგმა.

მისივე თქმით, ნატო ყველაფერს გააკეთებს, რაც აუცილებელია, რომ მოსკოვში არ იყოს გაუგებრობა ან მცდარი გათვლები ნატო-ს მზადყოფნასთან დაკავშირებით, დაიცვას მოკავშირეები და ნატო-ს ტერიტორიის თითოეული სანტიმეტრი.

„მიზეზი, რატომ ვაკეთებთ ამას, არის არა კონფლიქტის პროვოცირება, არამედ თავიდან აცილება. ეს იყო ნატო-ს წარმატება 70-ზე მეტი წლის განმავლობაში. ყველა პოტენციურმა მტერმა ყოველთვის იცოდა, რომ ერთ მოკავშირეზე თავდასხმა გამოიწვევს ყველა მოკავშირის პასუხს. ამის უსაფრთხოების ახალ რეალობაში უზრუნველსაყოფად, ჩვენ უნდა გადავტვირთოთ ჩვენი თავდაცვისუნარიანობა და შეკავების შესაძლებლობები. სწორედ ეს ვთხოვეთ მეთაურებს, რათა მოგვაწოდონ რჩევები, როგორ გადავტვირთოთ ჩვენი თავდაცვისუნარიანობა და შეკავების შესაძლებლობები. ჩვენ გავაკეთებთ ყველაფერს, რაც აუცილებელია.

ნატო-რუსეთის ფუძემდებელი აქტი შეიცავს ფრაზას „უსაფრთხოების ამჟამინდელ გარემოში“, რომელიც 1970 წელს გულისხმობს. ჩვენ არ ვართ „უსაფრთხოების ამჟამინდელ გარემოში“ დღეს, ჩვენ სრულიად განსხვავებულ უსაფრთხოების გარემოში ვართ. იმ ეტაპზე ჩვენ განვიხილავდით სამომავლოდ რუსეთს როგორც „სტრატეგიულ პარტნიორს“, ვმუშაობდით მათთან. მას შემდეგ რუსეთი შეიჭრა საქართველოში, მოახდინა ყირიმის უკანონო ანექსირება და ახლა ისევ შეიჭრა უკრაინაში. ასე რომ, ჩვენ გავაკეთებთ, რაც აუცილებელია. ნატო-რუსეთის ფუძემდებელი აქტი არ არის ის, რაც ნატო-ს აუცილებელი გადაწყვეტილებების მიღებაში პრობლემებს ან დაბრკოლებებს შეუქმნის“, – განაცხადა იენს სტოლტენბერგმა.